Pandemııa bizge saıasatty qaıta qaraý kerektigin kórsetip berdi - Elvıra Ázimova

ALMATY. QazAqparat – Pandemııa bizge saıasatty qaıta qaraý kerektigin kórsetti. Mundaı pikirdi «Ortalyq Azııa – Eýropalyq Odaq» azamattyq forýmy barysynda QR Adam quqyqtary jónindegi ýákili Elvıra Ázimova bildirdi, dep habarlaıdy QazAqparat tilshisi.

«Bul - Ortalyq Azııa arenasyndaǵy úshinshi forým. Ótken jyly is-shara koronavırýs epıdemıologııalyq jaǵdaıyna baılanysty onlaın formatta ótken bolatyn. Búgingi forýmnyń kún tártibinde birqatar máseleler kóterildi. Bári ózekti. Ásirese, pandemııa bizge saıasatty qaıta qaraý kerektigin kórsetti. Bul bıýdjetten qarjylandyrýǵa qatysty. Alaıda, bul QR Konstıtýtsııasynda kórsetilgen mindettemelerge teris áser etpeýi tıis. Birinshiden, memlekettiń áleýmettik baǵytyn damytýǵa nazar aýdarylady. Óıtkeni Konstıtýtsııada adam quqyqtary men bostandyqtary - memlekettiń eń joǵary qundylyǵy dep kórsetilgen»,- deıdi Elvıra Ázimova.

Buǵan deıin adam quqyqtary jónindegi Eýropalyq Odaqtyń arnaýly ókili Imon Gılmor barlyq memleketter jalpyǵa birdeı adam quqyqtary men negizgi bostandyqtaryn qurmetteý qaǵıdasyn ustanýy kerektigin aıtqan bolatyn.

Aıta keteıik, Almatyda «Ortalyq Azııa – Eýropalyq Odaq» azamattyq forýmy ótip jatyr.

Sharaǵa Ortalyq Azııanyń bes memleketi men Eýropalyq Odaqtyń delegatsııasy qatysyp jatyr.