Pandemııa «Bir beldeý, bir jol» jobalarynyń 60% keri áser etti

BEIJІŃ. QazAqparat – «Bir beldeý, bir jol» bastamasy jobalarynyń 60 paıyzǵa jýyǵyna COVID-19 pandemııasy keri áserin tıgizdi. Bul týraly juma kúni atalmysh bastama sheńberindegi halyqaralyq yntymaqtastyq boıynsha joǵary deńgeıdegi vıdeokonferentsııa qorytyndysyna arnalǵan brıfıngte QHR SІM halyqaralyq ekonomıka departamentiniń basshysy Van Sıaolýn málim etti, dep habarlaıdy «QazAqparat» HAA menshikti tilshisi.

«Jobalardyń 20 paıyzǵa jýyǵy qatty zardap shekti, 40 paıyzyna qandaı da bir dárejede keri áseri tıdi. Qalǵan 40 paıyzy kestege sáıkes iske asyrylýda», - dep atap ótti qytaılyq dıplomat.

Van Sıaolýn qytaılyq taraptyń úzaqmerzimdi transshekaralyq jobalarǵa qyzyǵýshylyq tanytyp otyrǵanyn jáne olardy tez arada ilgeriletýge múddeli ekenin atap ótti.

Statıstıkalyq málimetterge sáıkes, aǵymdaǵy jyldyń birinshi toqsanynda «Bir beldeý, bir jol» bastamasyna qatysýshy elderge Qytaıdyń quıǵan ınvestıtsııasy 11,7 paıyzǵa ósti, al taýar aınalymy 3,2 paıyzǵa artqan. «Qytaı-Eýropa» baǵyty boıynsha temirjol arqyly júk taýarlaryn turaqty túrde tasymaldaý reısteri men júk aınalymy 2020 jyldyń tórt aıynda ótken jyldyń osyndaı kezeńimen salystyrǵanda tıisinshe 24 jáne 27 paıyzǵa joǵary boldy.

Eske sala ketsek, «Bir beldeý, bir jol» bastamasyna eki joba – «Jibek jolynyń ekonomıkalyq beldeýi» jáne «21 ǵasyrdaǵy teńiz Jibek joly» jobalary biriktirilgen.