Pandemııa bastalǵaly JOO-lardyń shyǵyny ósti

NUR-SULTAN. QazAqparat – Pandemııa bastalǵaly joǵary oqý oryndary stýdentterdi qashyqtan oqytyp keledi. Oqytýdyń mundaı formaty JOO-lardyń bıýdjetine qalaı áser etti? Bul suraqqa Ortalyq kommýnıkatsııalar qyzmetinde ótken baspasóz máslıhatynda QR Bilim jáne ǵylym vıtse-mınıstri Mıras Dáýlenov jaýap berdi, dep habarlaıdy QazAqparat tilshisi.

«Nelikten stýdentterdiń oqý aqysy tómendemeıdi degen suraq bizge buryn da joldanǵan edi. Bul rette nege mán berý kerek? Joǵary oqý oryndary men kolledjder qashyqtan oqytý formatyna kóshken kezde osy bilim berý uıymdarynyń shyǵyny shyntýaıtynda óspese kemigen joq. Nelikten? Eń aldymen olarǵa sapaly tsıfrlyq kontent quryp, tsıfrlyq bilim berý platformalaryn ustap turý úshin qarajat qajet boldy. Odan bólek JOO-lar men kolledjder oqytý formatyna jańa amal-ádisterdi jolǵa qoıýǵa mindetteldi. JOO-lar týraly aıtar bolsaq, olarǵa osynaý kúrdeli jaǵdaıda serverlik, baılanysty jáne ınternet jyldamdyǵyn arttyrý mindeti júkteldi. Internet jıiligin jyldamdatpasa stýdentterge bilim berý qıynǵa aınalar edi», - dedi vıtse-mınıstr.

Mıras Dáýlenov onyń ústine JOO-lardyń basshylyǵy muǵalimderge aılyǵyn tóleý mindetin de oryndaǵanyn atap ótti.

«Mysaly sol bilim berý uıymdary turǵan nysandar eshkimge jalǵa berilgen joq. Tıisinshe ony ustap turýdyń ózi de qarajatty talap eteri sózsiz. Sondyqtan osy shyǵyndardyń bárin qosa, Bilim jáne ǵylym mınıstrligi oqý jyly bastalar aldynda JOO basshylaryna oqý aqysyn qymbattatpaýy kerektigi týraly hat joldady. Osylaısha, JOO-lar oqý aqysyn qymbattatqan joq», - dedi ol.