Pandemııa: Áleýmettik osal toptaǵy jastar BUU DB arqyly taǵylymdamadan ótti

NUR-SULTAN. QazAqparat – BUU Damý Baǵdarlamasy koronovırýsy pandemııasynyń áleýmettik-ekonomıkalyq zardaptaryn jumsartý boıynsha Qazaqstan úkimetine jedel qoldaý kórsetý baǵdarlamasy aıasynda áleýmettik osal toptaǵy 150 jasqa jumysqa ornalasý múmkindigin berdi.

Karantın kezinde jumysynan aıyrylǵan jastar kásibı biliktilikterin arttyrý trenıngteri men mentorlyq qoldaýdy qamtıtyn úsh aılyq taǵylymdamadan ótti, dep habarlaıdy QazAqparat.

«Qatysýshylar Nur-Sultan, Almaty qalalary jáne Qaraǵandy oblysyndaǵy kásiporyndar, úkimettik emes uıymdar jáne memlekettik organdarǵa jiberildi. Jastar jańa kásip ıgerý, tájirıbe jınaqtaý múmkindigine ıe bolyp, oǵan qosa aı saıyn 60 000 teńge kóleminde shákirtaqy alyp otyrdy. Úsh aı aralyǵynda jumys berýshiler olardy baıqap kórip, úzdikterine taǵylymdamadan soń eńbek kelisimsharttaryn usyndy», delingen baspasóz baıanynda.

Aıta keterligi, taǵylymdamadan ótýshilerdiń basym bóligi (84 adam) – áıelder eken. Qazaqstanda ataýly áleýmettik kómek alýshylardyń 90% astamy da áıelder ekeni málim.

«Qazaqstanda, búkil álemde sııaqty, COVID-19 pandemııasynyń eleýli áleýmettik-ekonomıkalyq zardaptary baıqalady, bul ásirese áleýmettik az qorǵalǵan halyqqa aýyr áser etýde. BUU DB bastamasy ekonomıkalyq belsendiliktiń báseńdeýi jáne jalpy eńbek naryǵyndaǵy belgisizdik jaǵdaıynda áleýmettik osal toptaǵy jastardyń ekonomıkalyq múmkindikterin keńeıtý men kásibı biliktilikterin damytýǵa úles qosýǵa baǵyttalǵan», - dep atap ótti Qazaqstandaǵy BUU DB Turaqty ókili ıAkýp Berısh.

Jobaǵa áleýmettik osal topqa kiretin jastarymen jumys isteýge arnaıy oqytylǵan 25 tálimger jumyldyryldy. Tálimgerler qatysýshylarmen turaqty túrde toptyq jáne jeke kezdesýler, maqsat qoıý, ózin-ózi uıymdastyrý, komandada jumys isteý jáne taım-menedjment negizderi boıynsha trenıngter ótkizdi. Koronavırýs ınfektsııasynyń taralýyna baılanysty vırýsqa qarsy sharalardy saqtaý jáne qashyqtan tıimdi jumys isteý taqyryptary da ózekti boldy.

Bul bastama - BUU Damý Baǵdarlamasynyń jastardy jumyspen qamtý boıynsha Qazaqstandaǵy keń kólemdi strategııasynyń bir bóligi, qaıta daıarlaý jáne kásibı biliktiliktilikti arttyrý, sonymen qatar eńbekke qajet kásipkerlik mashyqty, senimdilik pen ornyqtylyqty nyǵaıtý arqyly jumysqa ornalastyrýda qoldaý kórsetýge baǵyttalǵan.