Panalatqandarǵa taǵzym: Qazaqstan men OA elderine bosqyndarǵa kómek kórsetkeni úshin alǵys aıtyldy

MÁSKEÝ. QazAqparat - Máskeý túbindegi Krasnoarmeıskide Reseıde alǵash ret Orta Azııa elderi men Qazaqstan halyqtarynyń meıirimdiligi men qonaqjaılyǵyn eske alýǵa arnalǵan «Panalatqandarǵa taǵzym» atty aktsııa ótti.

Eske alý sharasyn Krasnoarmeısk ákimshiligi qala jurtshylyǵynyń bastamasymen uıymdastyrdy. Shaqyrylǵandardyń arasynda - elshilikter ókilderi, astanalyq aımaqta turatyn ulttyq dıasporalardyń belsendileri men kóshbasshylary, sondaı-aq Máskeý oblysy Qoǵamdyq palatasynyń músheleri boldy. Aktsııaǵa sondaı-aq Uly Otan soǵysy kezinde kóshirilgen Krasnoarmeısk turǵyndary boldy.

Qala okrýgynyń basshysy Aleksandr Ovchınnıkov qonaqtarǵa bul sharany ótkizýdiń maqsaty jáne onyń alar orny jaıly aıtty.

«Bul bizdiń shaǵyn aktsııamyz sol kezeńde bizdiń otandastarymyzdy jyly qabaq tanyta qarsy alyp, olarmen sońǵy bir úzik nanyn bólisip, dostyq pen birlikti kórsetken odaqtas respýblıkalarǵa degen alǵysymyzdyń bir kórinisi dep esepteńizder. Bizdiń olarǵa alǵysymyz sheksiz»,- dedi Krasnoarmeısk qalalyq oktýgynyń basshysy.

Sondaı-aq aktsııaǵa qatysýshylar UOS jyldarynda mert bolǵan Krasnoarmeısk qalasynyń turǵyndaryna arnalǵan obelıskige gúl shoqtaryn qoıdy, Krasnoarmeısk kadet mektep-ınternatynda jas óskindermen kezdesti.

Aktsııanyń ereksheligi - kelgen qonaqtarǵa dastarqan jaıyldy, óıtkeni, sol kezde jergilikti turǵyndar bosqyndarǵa bir úzim nandy aýzynan jyryp bergen bolatyn. Ortalyqazııalyq halyqtardyń dástúrli taǵamdary - taba nan, baýyrsaq, qatyq nemese júzim sııaqty taǵamdar qoıylyp, sol kezdegi júdeý kezeń eske alyndy.

Soǵys kezinde kóshirilgenderdiń biri Anatolıı Tregýb - buryn Almaty oblysyndaǵy Іle aýdanynyń ákimi bolǵan, qazir Krasnoarmeıskide turady. Ol otbasy 1941 jyly Ýkraınadan qonys aýdarǵanda ózi úsh jasta bolǵanyn áńgimeledi.

«Áli esimde. Biz Jambyl oblysynda turdyq. Anam saýynshy boldy. Biz qazaq tilin, qazaqtar - orys tilin oqyp-úırendi. Mektepten keıin ınstıtýt bitirip, partııalyq qyzmetterde boldym, el táýelsizdik alǵannan keıin de sonda jumys istep, óz úlesimdi qostym. Meni ósirip-tárbıelegen qazaq jerine alǵysym sheksiz», - dedi A.Tregýb.

Shara dastarhan basynda shúıirkelesip, Qazaqstan men Orta Azııa taǵamdarymen shaı ishýge ulasty.