Pan Gı Mýn: 2030jylǵa qaraı SPID pen bezgek aýrýynan arylamyz

ASTANA. QazAqparat - 2030 jylǵa qaraı adamzat SPID, týberkýlez jáne bezgek aýrýyn jeńe alady. Kanadanyń Monreal qalasynda ótip jatqan SPID, týberkýlez jáne bezgek aýrýlaryna qarsy Jahandyq qordyń resýrstaryn tolyqtyrý jónindegi konferentsııada sóz ala otyryp, BUU-nyń Bas hatshysy Pan Gı Mýn osylaı málim etken.

«Adamzattyń qazirgi bilimi men qarjysy 2030 jylǵa qaraı SPID, týberkýlez jáne bezgek aýrýlaryn jeńe alatyndaı áleýetke ıe»,-dep atap ótken BUU-nyń Bas hatshysy Pan Gı Mýn.

Osy aýrýlarǵa qarsy Jahandyq qor osy derttermen kúresý úshin 13 mlrd AQSh dollaryna suraý salǵan eken. Bul qarjyny aldaǵy úsh jylda jınaý kerek. Pan Gı Mýn bul mindetke jetý úshin búkil álemdi kúsh jumyldyrýǵa shaqyrǵan.  BUU Bas hatshysynyń  deregine súıensek, osy qordyń arqasynda 20 mln adamnyń jany aman qalǵan.

Jahandyq qor jumysyn bastaǵannan beri osy úsh aýrýdyń aldyn alyp, emdeý úshin álem boıynsha 150-den astam elge ondaǵan mlrd dollar aqsha bólgen.