Pamırde qodaspen kókpar tartýshylardy týrıster de qyzyqtaıdy - sheteldegi qazaq baspasózi
Pamır ústirtindegi qodas mingen kókparshylar -«Halyq» gazeti
Shyńjańnyń Tashqurǵan tájik avtonomııalyq aýdany Pamır ústirtiniń shyǵys eteginde ornalasqan. Onyń teńiz deńgeıinen ortasha bıiktigi 4 000 metrden asady. Qodas – Tashqurǵan aýdanynyń fermerleri men malshylary ósiretin negizgi mal túrleriniń biri jáne jergilikti halyqtyń turmysymen etene baılanysty janýar, - dep jazady Qytaıdyń «Halyq» gazeti aqparattyq portaly.
Qytaılyq BAQ keltirgen málimetine súıensek, qodaspen kókpar tartý – Tashqurǵan aýdanynda keń taralǵan dástúrli halyqtyq sport túri.
Keıingi jyldary bul erekshe dástúrli sporttyq is-shara Tashqurǵan aýdany týrıstik ındýstrııasynyń damýymen birge, saıahatshylar arasynda tanymal bola bastapty.
Tashqurǵandyqtar toı-tomalaqta qodaspen kókpar tartyp, merekeniń kórkin qyzdyrady. Qazirgi ýaqytta kókparshylar týrısterge osy erekshe sport túrin tanystyrý úshin aýdannyń mádenı týrızm mekemesi uıymdastyratyn aýqymdy is-sharalarǵa qatysyp júr.
Qytaılyq basylymnyń dereginshe, sporttyń bul túri 2009 jyly Shyńjań-Uıǵyr avtonomııalyq ólkesiniń materıaldyq emes mádenı muralary tizimine engizilgen.
Qaınar Qaısanaıuly halyqaralyq dárejedegi tóreshi atandy- «Kaznews»
2023 jylǵy aqpan aıynda Mońǵolııa astanasy Ulanbatyr qalasynda bokstan jattyqtyrýshylar men tóreshilerge arnalǵan semınar ótip, onda mońǵolııalyq mamandar da bilimin tolyqtyrǵan, dep habarlaıdy mońǵolııalyq»Kaznews» aqparattyq portaly.
Atalǵan aqparat kóziniń dereginshe, Halyqaralyq boks federatsııasy (IBA) uıymdastyrǵan semınar qorytyndysy boıynsha 16 mońǵolııalyq maman halyqaralyq dárejedegi «1 juldyzdy tóreshi» ataǵyna ıe boldy. Olardyń arasynda Baıan-Ólgıı aımaǵynyń Sport jáne deneshynyqtyrý basqarmasynyń basshysy, bokstan sport sheberi Qaınar Qaısanaıuly bar.
Aıta ketý kerek, Qaınar Qaısanaıuly basqarma basshysy qyzmetinen buryn boksta bapkerlikpen aınalysyp, óz aımaǵynan kóptegen shákirtter daıyndap shyǵarǵan.
Sonymen qatar, osy aptada «Kaznews» aqparattyq portalynda «Serikbol Sezhanuly karateden el chempıony atandy» degen taqyryptaǵy aqparat jaryq kórdi.
Mońǵolııalyq BAQ-tyń dereginshe, 8 sáýir kúni Ulanbatyr qalasynda karateden el chempıonaty ótken. Baıraqty básekede Baıan-Ólgıı aımaǵynyń abyroıyn qorǵap, Serikbol Sezhanuly -65 keli salmaqta chempıon atandy.
El chempıonatynda barlyǵy 42 medal sarapqa salynyp, 14 klýbtan 120 sportshy kýmıte jáne katana boıynsha baq synasty.
«Baıan-Ólgıı aımaǵy «Tarlan» klýbynyń bapkeri, ІІ dárejeli qara belbeý ıegeri, halyqaralyq sport sheberi Serikbol Sezhanuly bul joly karateden barlyq qarsylastaryn utyp, -65 keli salmaqta el chempıony atandy», - dep jazady»Kaznews».
Aqyn Nesipbek Aıtuly «Naýaı qalasynyń qurmetti azamaty» atandy - «ÓzA»
Álisher Naýaıdyń «Eskendir qorǵany» jáne «Láıli-Májnún» dastandaryn qazaq tiline aýdarǵan aqyn, aýdarmashy, Qazaqstan Respýblıkasy Memlekettik syılyǵynyń laýreaty Nesipbek Aıtuly osy jyldyń 29-30 naýryz kúnderi Naýaı qalasynda ótken halyqaralyq «Mýmtoz sherııat» ádebıet festıvaline qatysty, dep habarlaıdy «ÓzA» aqparattyq agenttigi.
Atalǵan basylymnyń dereginshe, osynaý halyqaralyq sharada Nesipbek Aıtulyna «Naýaı qalasynyń qurmetti azamaty» ataǵy berilip, Ózbekstan Jazýshylar odaǵynyń músheligine qabyldandy. Sondaı-aq, qazaqstandyq aqynǵa tıisti kýálikpen birge, baǵaly syılyqtar da tabys etildi. Aqyn festıval qatysýshylaryna «Álisher Naýaı jáne qazaq ádebıeti» taqyrybynda baıandamasyn daıyndap barǵan.
«Alaıda, festıval aıasynda kóptegen shara josparlanyp, qatysýshylardyń ýaqyty tyǵyz bolǵany úshin Naýaıǵa arnap jazǵan keremet óleńin oqýmen shektelýine týra kelgen. Degenmen, halyqaralyq festıvalge qonaqkáde jasaǵan Nesipbek Aıtulymen Naýaı qalasynan elordamyz Tashkent qalasyna qaıtar shaqta osy sharada aıtpaq bolǵan pikirleri jaıly suhbat qurýdyń sáti tústi», - dep jazady ózbekstandyq basylym. Osy aptada suhbatty «ÓzA» aqparattyq agenttigi oqyrmandaryna usyndy.
Qazaqstan Iranmen astyq eksporttaý termınalyn salý boıynsha keńesýdi jalǵastyrdy -«Parstoday»
Qazaqstan Parsy shyǵanaǵy jaǵalaýynda astyq eksporttaý termınalyn salý úshin Iranmen keńesýdi jalǵastyrdy, dep habarlaıdy ırandyq «Parstoday» aqparat agenttigi.
«Parstoday»-diń dereginshe, Qazaqstannyń Indýstrııa jáne ınfraqurylymdyq damý mınıstri Marat Qarabaev juma kúni qazaqstandyq kompanııalardyń Irandaǵy Parsy shyǵanaǵy jaǵalaýynda eksporttyq polıýs salý jónindegi kelissózderiniń jalǵasyp jatqanyn habarlady. Ol Astananyń Bandar-Abbasta termınal salýdy kózdep otyrǵanyna toqtalyp, bul termınaldyń iske qosylý merzimin 2025 jyly jarııalap, termınaldyń qurylysy qazaqstandyq Semurg Invest kompanııaǵa tapsyrylǵanyn aıtqan.
«Qarabaev bul baǵdarlamany júzege asyrý maqsatyn Qazaqstannan taýar shyǵarýdyń bir joly retinde jarııalap, kompanııanyń Kaspıı teńiziniń shyǵys jaǵalaýynda «Sarja» kópfýnktsıonaldy termınalyn ornatýǵa da atsalysatynyn aıtty. Qazaqstannyń Indýstrııa jáne ınfraqurylymdyq damý mınıstriniń aıtýynsha, jeke sektor Iran termınalynan eldiń ónimderin álemniń túkpir-túkpirine jóneltý maqsatynda osy elde eksporttyq hab qurýǵa tyrysyp jatyr», - dep jazady ırandyq basylym.
Túrkııaǵa gýmanıtarlyq kómekti «Qazaqstan temir joly» jetkizedi -
«Qazaqstan temir joly» ulttyq kompanııasy Qytaıdan Túrkııaǵa jóneltilgen gýmanıtarlyq júkti poıyzben jetkizedi. Qazaqstan arqyly jedel jetkizilim Prezıdent Qasym-Jomart Toqaevtyń tapsyrmasy boıynsha júzege asyrylady, dep habarlady Túrkııa Radıo Televızııa portaly.
Poıyz Qazaqstan aýmaǵynan rekordtyq 90 saǵatta ótip, júk Transkaspıı halyqaralyq kólik baǵyty arqyly Túrkııaǵa jetkiziledi.
Túrkııalyq basylymnyń keltirgen deregine súıensek, «Qazaqstan temir joly» ulttyq kompanııasy jer silkinisinen zardap shekkender ýaqytsha panalaýy úshin aldymen shatyrlar jóneltilip, Túrkııaǵa 200 konteıner gýmanıtarlyq júk jetkiziletinin habarlady.
Aıta keteıik, kompanııanyń júk poıyzy qyzmeti arqyly Qytaıdan Grýzııa porttaryna jetkizý merzimi 18 kúnge jáne túrik porttaryna 25 kúnge deıin qysqardy. Qazaqstan aýmaǵy arqyly júk Kaspıı teńiziniń jaǵalaýyndaǵy Aqtaý portyna, odan ári Ázerbaıjan men Grýzııa arqyly Túrkııaǵa jóneltiledi.