Palestına prezıdenti jańa mınıstrler kabınetin bekitti

<p>ASTANA. KAZINFORM &ndash; Palestına prezıdenti Mahmýd Abbas beısenbi kúni buryn taǵaıyndalǵan premer-mınıstr Mohammad Mustafa basqaratyn jańa úkimetti bekitti. Bul týraly <a href="https://www.wafa.ps/Pages/Details/92667" target="_blank" rel="noopener">WAFA</a> agenttigi jazdy.&nbsp;</p>

Palestına premer-mınıstri Mohammad Mustafa jańa mınıstrler kabınetin jasaqtady. Ol syrtqy ister mınıstri qyzmetin qatar atqarady jáne beısenbi kúni prezıdent Abbasqa jańa úkimetti usyndy. 

Palestına Prezıdenti tizimmen kelisip, M.Mustafanyń 19-shy úkimetine senim bildirip, jańa mınıstrler kabınetin bekitetin prezıdent jarlyǵyn shyǵardy. Úkimet músheleriniń ant berý rásimi jeksenbige josparlanǵan. 

M. Mustafa Palestına Prezıdentine joldaǵan málimdemesinde jańa úkimettiń birinshi ulttyq basymdyǵy – atysty dereý toqtatý, Izraıl áskerlerin Gaza sektorynan shyǵarý, gýmanıtarlyq kómek alý jáne ony anklavtyń barlyq aýdanyna jetkizý múmkindikterin qarastyratynyn atap ótti. Ol sondaı-aq Gaza sektoryndaǵy jaýapkershilikti qabyldaýdy qosa alǵanda, ınstıtýttardy biriktirý tujyrymdamasyn ázirleý boıynsha jumys isteýge ýáde berdi. 

Jańa úkimet sonymen qatar Gaza sektoryndaǵy jáne Batys jaǵalaýdaǵy qarjylyq jaǵdaı men ekonomıkalyq saldardy turaqtandyrýǵa kúsh salatynyn jetkizdi. 

Aıta keteıik, M.Mustafa osy aıda Palestına bıligin reformalaýǵa kómektesý mandatymen premer-mınıstr bolyp taǵaıyndaldy. 

Jańa úkimet quramyna 23 mınıstr kiredi, olardyń altaýy – Gaza sektorynan, densaýlyq saqtaý, qoǵamdyq jumystar, kólik, qaıyrymdylyq, ádilet jáne kommýnıkatsııa mınıstrlikteriniń basshylary. Sonymen qatar premer-mınıstrdiń birqatar keńestik qyzmetin de Gaza sektorynan shyqqandar atqarady. 

Jaqyn arada úkimet qarjylyq baqylaý men ashyqtyqty jaqsartý, bıýrokratııany ońtaılandyrý, zań ústemdigin nyǵaıtý, sot júıesiniń táýelsizdigin qorǵaý, sybaılas jemqorlyqpen kúres jáne adam quqyqtaryn qoldaýdy qamtıtyn keshendi reformalar baǵdarlamasyn ázirlep, ony júzege asyrý úshin jumystanady.