Palestına bıligi Gazadaǵy atysty toqtatýdy qoldaıdy

<p>ASTANA. KAZINFORM &mdash; Palestına premer-mınıstri Muhammed Mustafa sársenbi kúni Palestına bıligi Gaza sektorynda atysty toqtatýǵa baǵyttalǵan barlyq kúsh-jiger men bastamalardy tolyǵymen qoldaıtynyn aıtty, dep habarlady onyń keńsesi. Bul týraly <a href="https://russian.news.cn/20241031/3df53023519340de8aad998e4141e23a/c.html" target="_blank" rel="noopener">Sınhýa</a> agenttigi jazdy.&nbsp;</p>

Iordan ózeniniń ortalyq bóligindegi Ramalladada Lıýksembýrg vıtse-premeri jáne syrtqy ister mınıstri Ksave Bettelmenmen kezdesý barysynda «Bul qadamdar okkýpatsııany joıýǵa jáne táýelsiz Palestına memleketin qurýǵa baǵyttalǵan saıası protseske jol ashýǵa kómektesedi», - dedi Muhammed Mustafa.

M.Mustafa Eýropalyq Odaq pen oǵan múshe elderdi Izraılge qarsy sanktsııalar salýǵa jáne ony halyqaralyq zańdardy saqtaýǵa mindetteýge shaqyrdy, sondaı-aq Palestına atynan jınalǵan salyq túsimderin ustaýdy toqtatýdy ári ustalǵan barlyq qarajatty qaıtarý úshin Izraılge qysymdy kúsheıtýge shaqyrdy. 

Óz kezeginde K.Bettel eliniń arazdyqty toqtatýǵa, tutqyndar men ustalǵandardy bosatýǵa, Gazadaǵy gýmanıtarlyq qasiretterdi toqtatýǵa jáne búkil aımaqtaǵy jaǵdaıdy tómendetýge baǵyttalǵan kúsh-jigerdi qoldaıtynyn rastady.

Ol sondaı-aq Palestına halqynyń táýelsiz memleket qurý quqyǵyn qoldaıtynyn, BUU-nyń Taıaý Shyǵystaǵy palestınalyq bosqyndarǵa kómek kórsetý jónindegi agenttigin qarjylandyrýdy jáne BUU qararlarynyń jumysy men tolyq oryndalýyn qoldaıtynyn atap ótti.

Eske sala keteıik, buǵan deıin Izraılge Gazadaǵy atysty ýaqytsha toqtatý týraly usynys túspegenin jazǵan bolatynbyz.