Palestına premer-mınıstri otstavkaǵa ketti

<p>ASTANA. KAZINFORM &ndash; Palestınanyń premer-mınıstri Mohammed Shtaıe Gaza sektoryndaǵy &laquo;genotsıdke&raquo; baılanysty Abbasqa otstavkaǵa ketý jóninde ótinish berdi. Palestına premeriniń sheshimi AQSh-tyń Gaza sektoryndaǵy soǵystan keıin Palestına memleketin basqara alatyn saıası qurylym qurý maqsatynda Palestına avtonomııasyna qysym kórsetýi aıasynda qabyldanyp otyr.</p>

Palestınanyń premer-mınıstri Mohammad Shtaıe óz úkimetiniń Palestına aýmaǵyndaǵy zorlyq-zombylyq pen Gaza sektoryndaǵy soǵystyń kúsheıýine baılanysty otstavkaǵa ketetinin málimdedi.

«Ostavkaǵa ketý sheshimi Batys jaǵalaý men Ierýsalımdegi jaǵdaıdyń buryn-sońdy bolmaǵan shıelenisýi, sondaı-aq Gaza sektoryndaǵy soǵys, genotsıd jáne asharshylyqqa baılanysty qabyldandy», - dedi Shtaıe dúısenbi kúni Ramalladaǵy úkimet otyrysynda. 

Palestına avtonomııasynyń 18-shi úkimetin 2019 jyldyń naýryzynan beri basqarǵan Shtaıe Palestına prezıdenti Mahmýd Abbasqa otstavkaǵa ketý týraly ótinish berdi.

«Kelesi kezeń men onyń problemalary Gaza sektoryndaǵy jańa shyndyqty jáne Palestına birligi men ondaǵy bılik birligin keńeıtýge negizdelgen jalpy palestınalyq konsensýs qajettiligin eskeretin jańa úkimettik jáne saıası tetikterdi qajet etetinin kóremin», - dedi Shtaıe Facebook paraqshasynda.

Shtaıeniń málimdemesi AQSh-tyń Mahmýd Abbasqa Palestına bıligin jańartyp, soǵystan keıin Palestına memleketin basqara alatyn saıası qurylym boıynsha jumysty bastaý jónindegi qysymy kúsheıgen tusta aıtyldy.

Eki apta buryn Shtaıe «eger jańa úkimet qurý josparlansa, otstavkaǵa ketetinin» málimdegen. 

Izraıl premer-mınıstri Bınıamın Netanıahý Palestına avtonomııasynyń Palestına memleketin baqylaýǵa alý jáne Gaza sektoryn basqarý týraly úndeýlerin birneshe ret qabyldamaı tastady. 

Ótken aptada Izraıl zańgerleri tipti Netanıahýdyń Palestına memleketin kez kelgen «birjaqty» moıyndaýdan bas tartýyn qoldady.

Arab BAQ habarlaýynsha, Mahmýd Abbas jańa mınıstrler kabınetin qurýǵa yqtımal kandıdat retinde Palestına ınvestıtsııalyq qorynyń dırektorlar keńesiniń tóraǵasy Mohammed Mustafany usynady dep kútilýde. 

Reseı 29 aqpanda Máskeýde palestınaaralyq kezdesý ótkizedi dep kútilýde.

30 jyl buryn Oslodaǵy ýaqytsha bitim aıasynda qurylǵan Palestına bıligi basyp alynǵan Batys jaǵalaýdyń keıbir bólikterin shekteýli basqarýdy júzege asyryp otyr. 

2007 jyly Palestına avtonomııasy HAMAS-pen qaqtyǵysqa baılanysty Gaza sektoryn baqylaýdan bas tartqan.