Palestına Memleketiniń Prezıdenti M. Abbas: Biz Qazaqstandy baýyrlas el sanaımyz - «QazAqparat» HHA tilshisimen suhbat

AMMAN. QazAqparat - Qazaqstannyń Iordanııadaǵy Elshisi Azamat Berdibaı Palestına Memleketiniń birinshi Prezıdenti Mahmud .Abbasqa Qazaqstannyń Palestınadaǵy elshisi retinde qyzmetti qosa atqaratyn senim gramotasyn tapsyrdy.

Tapsyrý rásimi Amman qalasyndaǵy Palestına Memleketindegi elshilikte ótti, oǵan Palestınany azat etý uıymy atqarý komıtetiniń Bas hatshysy (PAU) Saıb Ýreıkat ta qatysty. Kezdesý barysynda taraptar Taıaý Shyǵystaǵy jaǵdaıdy jáne palestına máselesin talqylady.

A.Berdibaı Palestına basshysyn Qazaqstannyń syrtqy jáne ishki saıasatynyń negizgi aspektilerimen tanystyrdy. Eldegi qazirgi áleýmettik-ekonomıkalyq jaǵdaıdy, sondaı-aq memlekettiń iri halyqaralyq bastamalary týraly aıtyp berdi. Qazaqstandyq elshi áńgime barysynda tarapqa Qazaqstan Prezıdentiniń «Álem. XXI ǵasyr» manıfesinde atalyp ótilgen taqyryptardyń ózektiligine mán berdi.

Tapsyrý rásimi aıaqtalar tusta «QazAqparat» HAA tilshisine bergen suhbatynda Palestına Prezıdenti M.Abbas óziniń palestına máselesin retteýge qatysty perspektıvasyn aıtyp jáne Qazaqstanǵa rızashylyǵyn bildirdi.

«Biz Qazaqstanǵa rızashylyǵymyzdy bildiremiz, sizderdi baýyrlas el retinde sanaımyz. Elderińizdi baýyrlas degenimde men palestına-ızraıl daǵdarysyn sheshýge baılanysty BUU-da daýys berýlerge elderińizdiń qatysqanyn aıtyp otyrmyn. Palestına máselesi - bul tek qana palestınanyń ǵana máselesi emes, ol arab jáne barlyq musylman halyqtarynyń máselesi. Qazaqstandyqtar bizdiń basymyzdan keshkenderimizdi sezinip, bizge janashyrlyq tanytýda», - dedi Palestına basshysy M.Abbas suhbatynda.