Palestına elshisi Qazaqstandaǵy saılaý jaıynda: Basqa elderde de osyndaı tártip bolǵanyn tileımin

ASTANA. QazAqparat – Palestına memleketiniń Qazaqstandaǵy Tótenshe jáne Ókiletti Elshisi Montasır Abýzeıd Qazaqstanda depýtattardy saılaý qorytyndysyna qatysty pikir bildirdi, dep habarlaıdy QazAqparat tilshisi.

«Osyǵan deıin Albanııada, Nıgerııada, Belarýste halyqaralyq baıqaýshy boldym. Keshe Qazaqstanda ótken saılaýda 20-dan astam ýchaskege bardym. Atap aıtqanda, adamdarǵa emin-erkin daýys berýge múmkindik jasaldy. Jergilikti baıqaýshylarmen de pikir almastyq, olar saılaý ýchaskelerinde zań talaptaryna saı daýys berý júrip jatqanyn aıtty. Sarbazdar, polıtsııa qaıda? Qaýipsizdikti kim qamtamasyz etip júr dep suradym. Saılaý kúni qarý-jaraq asynǵan tártip saqshylaryn, polıtsııany baıqamadyq, biraq qaýipsizdik qamtamasyz etildi», - dedi Montasır Abýzeıd elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıngide.

Onyń paıymynsha, saılaý protsesinde qarý-jaraq asynǵan tártip saqshylary kóp júrse, bul kórinis daýys berýshilerdiń kóńil-kúıine keri áser etedi.

«Al Qazaqstanda 19 naýryz kúni saılaý ýchaskelerinde polıtsııa ókilderi kezdespedi. Jalpy, basqa elderde de daýys protsesi osylaı jeńil ótkenin qalaımyn», - dedi Elshi.

«Men úshin saılaýda halyqaralyq baıqaýshy bolý úlken mártebe. Keshe birqatar saılaý ýchaskesin aralap, daýys berý úshin tıisti jaǵdaı jasalǵanyn baıqadyq. Bizge jergilikti baıqaýshylardan eshqandaı shaǵym túsken joq», - dedi Montaser Abýzeıd.