Palaý Party: Astananyń 20 jyldyǵyna arnalǵan 20 qazan palaý

ASTANA. QazAqparat - Merekege oraı Qazaqstan halqy Assambleıasymen birlesip Qazaqstan ózbekteri «Dýstlık» qaýymdastyǵy «Palaý Party» qaıyrymdylyq aktsııasyn ótkizdi, dep habarlaıdy QazAqparat tilshisi.

Sharanyń maqsaty-  QR Prezıdentiniń «Rýhanı jańǵyrý» baǵdarlamasyn iske asyrý, qoǵamdyq sanasyn jańǵyrtý, etnosaralyq kelisimdi jáne ulttyq birlikti nasıhattaý.

Astanadaǵy «Stýdenttik» saıabaǵynda 4 myń adamǵa arnalyp 20 qazanda palaý daıarlandy. Qala turǵyndary men qonaqtarynan bólek palaýdyń belgili bóligi qalalyq qarttar, balalar jáne múgedekter úıine jetkizildi.

«Qala kúnine oraı «Dýstlık» qaýymdastyǵy Astana qalasy ákimdiginiń qoldaýymen qaıyrymdylyq sharasyn ótkizýdemiz. Bul eki baýyrlas qazaq-ózbek halqy arasyndaǵy dostyqtyń beriktiginiń belgisi. Búgingi sharaǵa elimizdiń barlyq óńirinen aspazdar arnaıy keldi. 20 jyldyq mereıtoıǵa oraı, ózimizdiń ulttyq, súıikti taǵamymyzdy syıǵa tartýdy jón kórdik. Odan bólek merekelik kóńil-kúıdi kótere túsý úshin belgili ózbek ónerpazdary qala kúnine arnalǵan kontsert qoıýda.

Árıne biz mereke kezinde, basqa kúnderi de qarttar, balalar úıindegi jandardy umytpaýymyz kerek, olarǵa ózimiz arnaıy baryp merekemen quttyqtap dámdi tartý ettik», - dedi Astana qalasy ózbek etnomádenı ortalyǵynyń tóraǵasy Sherzod Pýlatov.

Sonymen qatar Astanada 6 shilde kúni dúnıege kelgen 20 sábıge arnaıy syılyq uıymdastyrylýda. Jáne de shara sheńberinde qala turǵyndary men qonaqtary Qazaqstan ózbekteriniń mádenıeti, óneri, tarıhı murasy, shyǵys qonaqjaılylyǵy jáne ulttyq taǵam palaýdy daıyndaýymen tanysýǵa múmkindik aldy.

«Palaý Party» aspazdary Qazaqstannyń barlyq oblys, aýdandarynan keldi, ıaǵnı ár óńir bir qazannan palaý daıyndaýdy mindetimizge aldyq. Ár qazanda 20 keli kúrish bar, al 20 qazannan jobamen 4 myń adamǵa arnalǵan palaý ázirledik», -dedi Qaraǵandydan kelgen aspaz Baqtııar Ysqaqov.