Palaý festıvali: Astanada bir tonnadan astam palaý ázirlendi

<p>ASTANA. KAZINFORM &mdash; Elordanyń ortalyq saıabaǵynda Ózbekstan, Ázerbaıjan, Tájikstan jáne Qyrǵyzstan elderiniń aspazdary bir tonnadan astam palaý ázirledi, dep habarlaıdy Astana ákimdiginiń resmı saıty.</p>

Naýryz meıramy ortalyq saıabaqta alǵash ret toılanyp jatyr. Mereke halyqaralyq deńgeıde ótýde. Іs-sharaǵa kórshi elderdiń aspazdarymen qatar Tájikstan men Iran elshilikteri de qatysty. Olar kıiz úılerin tigip, onda óz mádenıetterinde Naýryz merekesiniń toılanýynyń aıyrmashylyqtary týraly áńgimelep, dástúrli taǵamdarmen dám tattyrdy.

Saıabaqtyń alleıasynda tazy men batyrlar sherýi ótip, dombyrashylar áıgili halyq ánderin oryndap, erekshe merekelik kóńil-kúı syılady.

Merekelik sharaǵa elordalyq «Barys» klýbynyń hokkeıshileri men klýbtyń boıtumary «Barsık» keldi. Munda olar jankúıerlerimen kezdesip, qoltańba berip, estelik sýretke túsedi.

Ortalyq saıabaqta kóktemniń basty merekesi eki kún boıy toılanady. 22 naýryz kúni de saǵat 13:00-de kontserttik baǵdarlama ótip, ulttyq taǵamdar ázirlenedi.