Palata otyrysyna qatyspaǵan, ádep saqtamaǵan ózbekstandyq depýtattardyń ókilettigi toqtatylmaq

<p>TAShKENT. KAZINFORM &ndash; Ózbekstan prezıdenti Shavkat Mırzıeev depýtattar men senatorlarǵa jańa mindetteme men jaza engizý týraly zańǵa <a href="https://lex.uz/ru/pdfs/6994017" target="_blank" rel="noopener">qol qoıdy</a>, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Zańnyn jańa redaktsııasyna saı, depýtat pen senatordyń ókilettikteri kelesi jaǵdaılarda merziminen buryn toqtatylady:

- eger depýtat pen senator eskertýdi elemesten ózge de aqyly qyzmetpen (ǵylymı, shyǵarmashylyq jáne pedagogıkalyq qyzmetten basqa) aınalysatyn bolsa;

- palatanyń, fraktsııasynyń, komıtettiń, ózi saılanǵan komıssııanyń otyrysyna 1 jyl ishinde dálelsiz sebeptermen 30 nemese odan da kóp kún qatyspasa (bul jaǵdaıda olardyń ókilettigi Zań shyǵarý palatasynyń nemese Senattyń sheshimimen toqtatylady);

- shet memlekette turaqty turýǵa yqtııarhat nemese sheteldiń aýmaǵynda turaqty turý quqyǵyn rastaıtyn ózge de qujat alsa.

Buǵan qosa, ádep saqtamaǵan depýtat pen senatorǵa qoldanylatyn jaza túri ózgeredi. Endi etıka erejesin buzǵany úshin olarǵa kelesi sharalar qoldanylady:

- depýtatqa nemese senatorǵa ádep qaǵıdasyn buzýǵa bolmaıtynyn nasıhattaı otyryp, eskertý jasaý;

- depýtattan ıakı senatordan Zań shyǵarý palatasy men Senattyń otyrysynda keshirim suraýyn talap etý;

- depýtattyń nemese senatordyń ádep saqtamaý faktisin otyrystarda kópshilikke jarııa etý;

- depýtat pen senator jalaqysynyń bir bóligin ustap qalý;

- depýtattyń nemese senatordyń ókilettigin merziminen buryn toqtatý.