Pákistandyq hakerler qyrǵyzstandyqtardyń jeke derekterin jarııalady

<p>ASTANA. KAZINFORM &ndash; 22 mamyrda &laquo;Team Insane Pakistan&raquo; hakerlik toby 18 mamyrda Bishkekte sheteldik stýdentterdiń qatysýymen bolǵan túngi tártipsizdikterge jaýap retinde 600 myńnan astam qyrǵyzstandyqtyń derbes derekterin jarııalaǵany týraly Qyrǵyzstannyń áleýmettik jelileri men BAQ-ta aqparat tarap jatyr.</p>

Qyrǵyzstannyń derbes derekterdi qorǵaý jónindegi memlekettik agenttigi 600 myńnan astam qyrǵyzstandyq salyq tóleýshiniń málimetteri 2020 jyly jarııalanǵan ashyq, qoljetimdi derekter ekenin jáne derekterdiń salyq qupııasyna jatpaıtyndyǵyn habarlap otyr. Osylaısha agenttik sońǵy ýaqytta memlekettik saıttardan eshqandaı aqparattyń shyqpaǵanyn málim etti.

«Qyrǵyzstan azamattarynyń jarııalanǵan 600 myń derbes jazbalaryn taldaý olardyń 2020 jyly memlekettik salyq qyzmetiniń servısterinen taratylyp ketý nátıjesinde jarııalanǵan derekterge uqsas ekenin kórsetti», - dep jaýap berdi memlekettik organ.

Sondaı-aq, Qyrǵyz Respýblıkasynyń Tsıfrlyq damý mınıstrligi eldiń memlekettik organdarynyń ınfraqurylymyna jasalǵan hakerlik shabýyldar jáne azamattardyń jeke derekterin urlaý týraly taratylǵan aqparattyń jaı-kúıine túsinikteme berdi.

«Vedomstvo turaqty negizde aqparattyq aktıvterdi álsiz tustar men ruqsatsyz qoljetkizý faktilerin anyqtaý turǵysynan skanerleý boıynsha júıeli jumys júrgizýde. Qazir mınıstrliktiń qaramaǵyndaǵy memlekettik aqparattyq júıeler shtattyq rejımde jumys istep tur. Mınıstrlik qyzmetkerleri Memlekettik ulttyq qaýipsizdik komıtetiniń kıberqaýipsizdikti úılestirý ortalyǵymen, derbes derekterdi qorǵaý jónindegi memlekettik agenttikpen baılanysta jáne jarııalanǵan derbes aqparat massıvine zertteý júrgizedi», - delingen habarlamada.