Pákistanda zaýytqa jasalǵan shabýyl saldarynan eki polıtseı mert bolyp, taǵy úsheýi jaraqat aldy
Kazinform agenttigi bul týraly Sınhýa aqparat agenttigine silteme jasap habarlaıdy.
Oqıǵa Dera-Ismaıl-Han aýdanynda bolǵan. Tańerteń qoldaryna qarý ustaǵan kem degende 20 sodyr zaýytqa kirmek bolǵan, dep habarlady aımaq polıtsııasy sýperıntendantynyń orynbasary Sher Ýlla.
Zaýyttyń negizgi qaqpasynda turǵan polıtseıler tez arada áreket etip, shabýylǵa toıtarys berdi, qaskúnemder qashýǵa májbúr boldy, dep qosyp ótti ofıtser.
Onyń aıtýynsha, shabýyl jasalǵan jerde munaı uńǵymasy men qyzmetkerlerdiń úıleri bar - shabýyldaýshylar aımaqqa kire alǵan jaǵdaıda sońy odan da qaıǵyly bolýy ábden múmkin edi.
Ofıtserdiń aıtýynsha, zaýytta polıtsııa men áskerılendirilgen kúshterdiń kóp deńgeıli qaýipsizdigi bar. Olar eldegi lańkestik áreketter sanynyń artýyna baılanysty joǵary daıyndyqta boldy.
Jaraqat alǵan polıtseıler jaqyn mańdaǵy aýrýhanaǵa jetkizildi. Sodyrlar taýǵa qaraı qashyp ketken, polıtsııa olardyń kimder ekenin ózderi qaldyrǵan aıǵaq dálelderdiń kómegimen anyqtap jatyr, dep qosty ofıtser.
Shabýyl úshin jaýapkershilikti eshbir top óz moınyna alǵan joq.