Pákistannyń ońtústiginde bolǵan jer silkinisinen 15 adam qaza tapty

ISLAMABAD. TASS-QazAqparat – Beısenbige qaraǵan túni Pákistannyń ońtústiginde tirkelgen jer silkinisi saldarynan keminde 15 adam qaza tapty, dep habarlaıdy QazAqparat TASS agenttigine silteme jasap.

«Qazirgi ýaqytta 15-ten 20 adamǵa deıin mert boldy. Qaza tapqandardyń sany artýy múmkin», - dep málimdedi Agence France-Presse agenttigine apattarǵa qarsy kúres basqarmasy.

Agenttik jer silkinisinen eń qatty zardap shekken Belýdjıstan provıntsııasy bıligi ókiline silteme jasaı otyryp habarlaǵandaı, qulaǵan ǵımarattyń astynda birneshe adam ajal qushqan.

Onyń arasynda áıel men alty bala bar.

Buǵan deıin Eýropalyq-Jerorta teńiziniń seısmologııalyq ortalyǵy Pákistan aýmaǵynda bolǵan 5,7 baldyq jer silkinisi jaıly habarlaǵan bolatyn.

Jer asty dúmpýleriniń epıtsentri Kvetta qalasynan (halqy shamamen 733 myń turǵyn) soltústik-shyǵysqa qaraı 102 shaqyrym jerde ornalasqan.

Jer silkinisiniń oshaǵy 10 shaqyrym tereńdikte.