Pákistannan Astanaǵa jemis-jıdek jetkizile bastady
260 tonna mandarın tıegen refrıjeratorlyq konteınerlik poıyzy Pákistan-Iran-Túrikmenstan-Qazaqstan memleketteri aýmaǵyn, ıaǵnı 5 myń shaqyrym joldy 18 kúnde júrip ótti.
«Buryn Pákistannan jemis-jıdekter avtokólikpen jáne teńiz kóligimen uzaq júretin. Ásirese, teńiz arqyly 45 kún júretin bolsa, endigi jerde ónimderdi jetkizý merzimi eki esege qysqardy»,- deıdi «KTZ Express» AQ konteınerlik tasymaldaý departamentiniń dırektory A. Kárimov.
«Bul baǵdardy odan ári meńgerip, tolyq qýatynda iske qosý úshin aptasyna bir konteınerlik poıyzdy jasaqtaýdy josparlap otyrmyz»,-deıdi ol.
Baspasóz qyzmeti taratqan málimetterge qaraǵanda, jańa logıstıkalyq qyzmet túri tez buzylatyn jemis jıdekterdi belgili temperatýrada jetkizýge yqpal etedi. Olardyń qatarynda tońazytylǵan kókónister, jemis-jıdekter, medıtsınalyq jáne farmatsevtıkalyq taýarlar bar.