Pákistanda qazaqstandyq arnaıy jasaqtyń jaýyngerlik qabilettiligi baǵalandy

ISLAMABAD. QazAqparat - Pákistan astanasy Islamabadtan 150 shaqyrym jerde ornalasqan Pabbı qalasyndaǵy Pákistan Islam Respýblıkasy Qarýly Kúshteriniń ulttyq lańkestikke qarsy ortalyǵynyń bazasynda «DOSTARYM-2017» Qazaqstan jáne Pákistan birlesken áskerı oqý-jattyǵýlarynyń resmı jabylý rásimi ótti.

«QazAqparat» HAA tilshisiniń habarlaýynsha, oǵan eki eldiń 100-den astam arnaıy jasaq áskerı qyzmetshisi qatysyp, 70 áskerı jáne arnaıy tehnıka jumyldyrylǵan.

Qazaqstandyq áskerı qyzmetshiler eki apta boıy pákistandyq áriptesterimen lańkestikke qarsy kúres boıynsha tájirıbe almasty. «Dostarym-2017» jıynynyń qorytyndy kezeńinde Pákistan armııasynyń basshylyǵyna «Slajıvanıe grýpp» toptyq jattyǵýlardy qamtyǵan taktıkalyq arnaıy daıyndyq kórsetildi.

Qazaqstan-Pákistan birlesken áskerı oqý jattyǵýy aıaqtalǵan soń PIR QK-niń lańkestikke qarsy bólimshesiniń basshysy general Chırah Qazaqstan áskerı arnaıy jasaǵynyń joǵary daıyndyq deńgeıi men kásibıligin atap ótti. Onyń sózine qaraǵanda, Pákistan tarapy budan keıin de áskerı-saıası salada tájirıbe almasýǵa ázir ekenin bildirdi.