Pákistanda avtobýs apatqa ushyrap, 41 adam mert boldy

ASTANA. QazAqparat – Pákistannyń ońtústik-batysyndaǵy Belýdjıstan provıntsııasynda avtobýs apatqa ushyrap, 41 adam qaza tapty, dep habarlaıdy QazAqparat Deutsche Welle-ge silteme jasap.

Álemdik aqparat agenttikteriniń úkimet ókilderine silteme jasap habarlaýynsha, avtobýs kópirdiń tireýishine soǵylyp, jyraǵa qulaǵan jáne órtengen.

Apat ornyna barǵan Belýdjıstan provıntsııasyndaǵy Lasbela okrýgi ákimshiligi basshylyǵynyń ókili qaza tapqandardyń kóbin taný múmkin emestigin, ol DNQ taldaýy arqyly anyqtalatynyn jetkizdi.

Avtobýsta 48 adam bolǵan. Ol provıntsııanyń ákimshilik ortalyǵy – Kvetta qalasy men Pákistannyń ońtústigindegi Karachı portty qalasy arasynda júrip bara jatqan. Bılik málimetine sáıkes, 3 adam qutqaryldy.

Lasbela okrýgi ákimshiligi ókiliniń aıtýynsha, apatqa avtobýs júrgizýshisiniń uıyqtap ketýi sebep bolýy múmkin.

Buǵan deıin Pákistannyń Haıber-Pahtýnhva provıntsııasynda keme aýdarylyp, 10 oqýshynyń sýǵa batyp ketkeni habarlanǵan edi.