Pákistan meshitindegi jarylystan qaza tapqandar sany 59-ǵa jetti

ASTANA. QazAqparat – Pákistannyń Peshavar qalasyndaǵy meshitte bolǵan jarylystan keminde 59 adam qaza taýyp, 150-den astamy jaralandy. Jarylys túski namaz kezinde bolǵan, ǵımarattyń bir bóligi qırap, kóp adam úıindi astynda qalyp qoıǵan, dep habarlaıdy QazAqparat VVS-ge silteme jasap.

Jarylystyń sebebi anyqtalyp jatyr. Bılik namazǵa qatysýshylar arasynda polıtsııa qyzmetkerleri kóp bolǵandyqtan, bul aldyn ala josparlanǵan maqsatty is bolýy múmkin deıdi.

Qaýipsizdik qyzmeti ókilderiniń aıtýynsha, namaz oqyp jatqandardyń aldyńǵy qatarynda turǵan jankeshti ózin-ózi jaryp jibergen. Ázirge shabýyldy eshbir top óz moınyna alǵan joq.

Pákistan premer-mınıstri Shahbaz Sharıf jarylys jasaǵandardy aıyptap, olardyń ıslamǵa esh qatysy joq ekenin aıtty.

Jarylys túski namaz kezinde bolǵan jáne áleýmettik jelide taraǵan Bı-bı-sı rastaǵan vıdeoda meshit qabyrǵasynyń jartysy opyrylyp, aman qalǵandar kirpish úıindileriniń astynan shyǵýǵa májbúr bolǵany kórsetilgen.

Qazir oqıǵa ornynda qutqarýshylar tiri qalǵandar men qaza tapqandardy izdeý operatsııasyn jalǵastyryp jatyr.

Peshavardaǵy Ledı Redıng aýrýhanasynda tótenshe jaǵdaı jarııalandy – jaralylar áli de kelip jatyr, kóbiniń jaǵdaıy aýyr.

Ótken naýryzda Peshavarda shııtterdiń meshiti jarylyp, ondaǵan adam qaza tapty. Islamabadta polıtsııa lańkestik qaýip-qaterdiń joǵary deńgeıin jarııalap, astanadaǵy jáne odan tys jerlerdegi barlyq baqylaý-ótkizý beketterinde tekserý kúsheıtildi.

Buǵan deıin jarylystan 32 adam qaza tapqanyn habarlaǵan bolatynbyz.

Foto: bbc.com