Pákistan aýmaǵynyń basym bóligi sý tasqynynan zardap shekti

ISLAMABAD. QazAqparat – Pákistan aýmaǵynyń basym bóligi myńǵa jýyq adamnyń ómirin qıǵan kúshti mýssonnan keıingi joıqyn sý tasqynynyń zardaptaryn bastan keshýde, dep habarlaıdy QazAqparat Associated Press-ke silteme jasap.

Pákistannyń Tabıǵı apatqa qarsy kúres jónindegi ulttyq basqarmasy senbi kúni sý tasqynynyń saldary týraly sońǵy málimetti jarııalady. Búginde nóser jaýyn saldarynan oryn alǵan oqys oqıǵalardan 982 adam qaza taýyp, 1456 adam jaraqat alǵan.

Juma kúni Pákistan premer-mınıstri Shahbaz Sharıf halyqaralyq kómekke júgindi.

Tolassyz jaýǵan jańbyrdan sý tasqyny ornap, mıllıondaǵan adam baspanasyz qalyp, el boıynsha jarty mıllıonnan astam úıdi qıratqan qatty sý tasqyny boldy. Olar sondaı-aq 2 mln gektarǵa jýyq eginge zııan keltirip, 802 myń bas maldyń shyǵynyna ákeldi. Búginde Pákistannyń kóptegen jerinde joldar shaıylyp, halyqtyń bir bóligi azyq-túlik pen jaryqsyz qaldy. Sý tasqyny 3 myń shaqyrymǵa jýyq jol men 149 kópirdi qıratty.

El úkimetiniń málimetinshe, Pákistandaǵy 160 aýdannyń 116-synda 30 mıllıonǵa jýyq adam nemese el halqynyń 15 paıyzy jańbyr men sý tasqynynan zardap shekti. Sarapshylardyń baǵalaýynsha, aǵymdaǵy qarjy jylynda buryn-sońdy bolmaǵan jańbyr men sý tasqynynan kelgen ekonomıkalyq shyǵyn 4 mlrd dollardan asyp tur.

Uıym jaǵdaı odan ary nasharlaıdy dep alańdaýshylyq bildirýde, óıtkeni mundaı sý tasqyny sý arqyly taralatyn aýrýlardyń kóbeıý qaýpin týdyrýy múmkin.

Pákistandaǵy jergilikti, úkimettik jáne jahandyq uıymdar muqtaj jandarǵa kómek kórsete bastady.