«Paketimde bomba bar»: Astana áýejaıyn dúrliktirgen jolaýshyǵa úkim shyqty

ASTANA. QazAqparat – Astana qalasynyń Esil aýdandyq №2 soty terrorızm aktisi týraly kórineý jalǵan aqparat taratqan azamatqa qatysty aıyptaý úkimin shyǵardy, dep habarlaıdy QazAqparat tilshisi.

Sot taratqan málimetke sáıkes, ótken jyldyń 8 qazanynda ishimdikke mas kúıde bolǵan azamat Ǵ. ushaqta otyrǵan kezde bortserikke paketinde bomba baryn aıtqan. Astana qalasynyń quqyq qorǵaý organdarynyń jedel-izdestirý sharasy barysynda áýe kemesinen qandaı da bir jarylǵysh zat tabylǵan joq. Osylaısha, atalǵan azamattyń terrorızm aktisi týraly jalǵan habar bergeni anyqtaldy.

Sot barysynda azamat Ǵ. kinásin tolyqtaı moıyndap, istegen isine ókinetinin bildirdi jáne zardap shegýshilerdiń báriniń shyǵynyn óz erkimen ótep berdi. Sot kúdiktiniń kámeletke tolmaǵan eki balasy baryn, kinásin moıyndaǵanyn, shyǵyndy ótegenin – jazany jeńildetetin mán-jaı dep tanydy.

Jalpy, QR Qylmystyq kodeksiniń 273-babynda mundaı qylmys ortasha aýyr sanatyna jiktelgen. bap sanktsııasynda aıyppul túrindegi jaza, túzetý jumystary jáne bes jylǵa bas bostandyǵynan aıyrý nemese bas bostandyǵyn shekteý kózdelgen.

Nátıjesinde sot azamat Ǵ.-ǵa úsh jylǵa bas bostandyǵyn shekteý túrindegi jaza taǵaıyndap, probatsııalyq baqylaý belgiledi. Úkim zańdy kúshine engen joq.

Ótken jyldyń qazan aıynda «Astana-Almaty» baǵytyndaǵy áýe reısi jolaýshysynyń bomba týraly habarynan keıin 170-ke jýyq adam ushaqtan evakýatsııalanyp, áýejaı jumysy toqtatylǵanyn jazǵan edik.