«Paketimde bomba bar»: Astana áýejaıy jumysyn toqtatyp, adamdar evakýatsııalandy

ASTANA. QazAqparat – «Astana-Almaty» baǵytyndaǵy avıareıs jolaýshysynyń bomba týraly habarynan keıin, 170-ke jýyq adam ushaqtan evakýatsııalanyp, áýejaı jumysy toqtatyldy, dep habarlaıdy QazAqparat.

Kóliktegi polıtsııa departamentiniń baspasóz qyzmetinen málim etkendeı, búgin túngi saǵat 02.35-te «Astana-Almaty» baǵytyndaǵy áýe reısiniń bortserigi jolaýshylardyń biriniń qol júginde bomba bar ekenin habarlaǵan. Bul týraly bortserikke jolaýshynyń ózi aıtyp, paketin kórsetken. Almaty oblysynyń 33 jastaǵy turǵyny mas bolǵan. Keıin muny ázil úshin aıtqanyn jetkizgen.

«Dabyl boıynsha barlyq jedel qyzmetter jumyldyrylyp, adamdar evakýatsııalandy, sonyń ishinde ushaqtyń 166 jolaýshysy bar. Áýejaı jumysy ýaqytsha toqtatyldy.

Barlyq jolaýshylar men ekıpaj múshelerine úsh saǵat boıy óz reısteriniń ushýyn kútýge týra keldi.

Laınerdi teksergennen keıin eshqandaı jarylǵysh zat tabylǵan joq.

Quqyqbuzýshyǵa qatysty QR Qylmystyq kodeksiniń 273-baby «Terrorızm aktisi týraly kórineý jalǵan habarlaý» boıynsha qylmystyq is qozǵaldy», - delingen málimette.

Endi er adam memlekettiń, sondaı-aq azamattar men jeke uıymdardyń shyǵyndaryn mindetti túrde óteı otyryp, bes jylǵa deıin bas bostandyǵynan aıyrylýy múmkin.

Bomba týraly ázildegen jolaýshy ýaqytsha ustaý ızolıatoryna qamaldy.

«Sotqa deıingi tergep-tekserý isi Іshki ister mınıstrliginiń jáne prokýratýranyń baqylaýynda tur», - dep qosty Kóliktegi polıtsııa departamentinen.