Ozon men Wildberries-te qansha qazaqstandyq satýshy tirkelgen

<p>ASTANA. KAZINFORM &ndash; Elektrondy marketpleısterde otandyq taýarlardyń kóptep usynylýyna kóńil bólinedi. Bul týraly Saýda jáne ıntegratsııa mınıstri Arman Shaqqalıev baıandady.</p>

«Biz 2025 jylǵa deıin elektrondyq saýdany damytý jónindegi is-sharalar josparyn qabyldadyq. Elektrondyq saýdada tutynýshylar quqyqtaryn qorǵaýdy qamtamasyz etý maqsatynda túzetýler ázirlendi, qazir osy zań jobasy Parlament Májilisinde qaralýda», - dedi A. Shaqqalıev Úkimet otyrysynda.

Mınıstrdiń aıtýynsha, marketpleısterde otandyq óndiris taýarlarynyń usynylýyn keńeıtýge erekshe nazar aýdarylady. Búginde Slever Market marketpleısiniń basty paraqshalarynda qazaqstandyq ónimge banner shyǵaryldy, aldymen qazaqstandyq ónimdi izdeý nátıjelerin shyǵarýda basymdyq berilgen.

«Qytaıdyń Alibaba jáne JD.com iri marketpleısterinde ulttyq pavılondar ashyldy. Búgingi tańda Alibaba-da 7500 taýar, JD.com-da taýarlardyń 30 túri usynylǵan, osy platformaǵa 1,5 mıllıonnan astam qazaqstandyq qyzyǵýshylyq tanytýda», - dedi ol.

Sonymen birge, Qazaqstanda eki iri reseılik marketpleıs – Ozon jáne Vaıldberrız jumys isteıdi. 2023 jyldyń sońyndaǵy jaǵdaı boıynsha Ozon alańynda – 45 400, Vaıldberrız alańynda – 55 704 qazaqstandyq satýshy tirkelgen.

«Ozon marketpleısi eki fýlfılment-suryptaý ortalyǵyn iske qosty, barlyq qalalarda 1189 tapsyrysty jetkizý pýnkti ashyldy. Vaıldberrız marketpleısi jalpy aýdany 29 600 m2 bolatyn 6 logıstıkalyq ortalyq jáne 621 tapsyrysty jetkizý pýnkti ashqan, sondaı-aq Astana men Almaty qalalarynda eki fýlfılment ortalyǵyn salý josparlanýda», - dedi Saýda mınıstri.