«Ózin pııar etken»: Sot Núkenovaǵa qatysty aqparat taratqan blogerdiń isin qaıta qarady

<p>ALMATY. KAZINFORM &mdash; Almaty qalalyq sotynda S. Núkenovaǵa qatysty aqparat taratqan A.Býdarovqa qatysty azamattyq is alqalyq tártipte qaıta qaraldy.</p>

Buǵan deıin sot A.Býdarov tarapynan Instagram paraqshasynda taratylǵan S. Nýkenovaǵa qatysty málimetterdiń shyndyqqa sáıkes kelmeıtinin, ar-namysyn, qadir-qasıetin qorlaıtyndyǵyn moıyndap, jaýapkerge olardy óziniń jeke paraqshasynda jarııaly túrde joqqa shyǵarý mindetin júktegen.

Alqa jaýapkerdiń apellıatsııalyq shaǵymyn negizsiz, al sottyń sheshimin zańdy jáne negizdelgen dep tanydy.

Sotta A. Býdarov Instagram-daǵy «budarov_anton» ınternet paraqshasy oǵan tıesili ekenin joqqa shyǵardy. Bul dálelder is materıaldarymen joqqa shyǵaryldy.

— Atalǵan ınternet paraqsha A.Býdarovqa tıesili telegramm jelisimen baılanysty. Sonymen qatar, YouTube áleýmettik jelisinde jaýapkerdiń beıneposttaryn jarııalaıtyn «Anton Býdarov [Býdanbaı]» akkaýnty bar. Ár beıneposttyń astynda jaýapkerdiń Instagram-da «budarov_anton» jeke ınternet paraqshasy bar ekendigi aıqyn kórsetilgen, — dep habarlady qalalyq sottan.

Sondaı-aq apellıatsııalyq shaǵymdaǵy jaýapkerge sot talqylaýy týraly habarlandyrýdyń kelmeýi týraly shaǵym rastalmady. Aýdandyq sot sottalýshyǵa sheshim shyǵarylǵanǵa deıin is júrgizý týraly 4 ret habardar etken. Habarlamaǵa qaramastan aıyptalýshy sot otyrysyna múldem qatyspaǵan.

— Sot sheshimi eldegi joǵary oqý oryndarynyń biriniń til mamanynyń qorytyndysyna negizdelgen. Zerttelgen mátinniń jalpy mándik baǵyty tragedııalyq jaǵdaıǵa tap bolǵan S. Núkenovanyń tulǵasyna tikeleı qatysty. Jarııalaýlardyń avtorynyń kommýnıkatıvtik maqsaty mátinniń mazmunynan shyǵady. Bul S. Núkenovanyń ólimimen baılanysty tragedııalyq oqıǵanyń qoǵamdyq rezonansynda ózin pııar etý, — dep habarlady sottan.

Sondaı-aq qalalyq sot málimetine sáıkes, sot protsesinde jaýapkerdiń tarapynan sarapshynyń qorytyndylaryn joqqa shyǵaratyn birde-bir dálel keltirilmegen, sottyq saraptama júrgizý týraly ótinish berilmegen, osylaısha protsestik qatelikke jol berilgen. Sondyqtan talap qoıýshy jaýapker A.Býdarov tarapynan shyndyqqa sáıkes kelmeıtin jáne S. Núkenovanyń ar-namysyn, qadir-qasıetin tómendetetin derekterdiń taralǵandyǵyn dáleldedi. Jaýapker tarapynan taralǵan málimetterdiń shyndyqqa sáıkes keletindigi dáleldenbedi.

— Sot kollegııasynyń qaýlysymen sot sheshimi ózgerissiz qaldyrylyp, jaýapkerdiń apellıatsııalyq shaǵymy qanaǵattandyrylmady, — dep habarlady Almaty sotynyń baspasóz qyzmeti.

Qaýly zańdy kúshine endi.