Ózine para usynylǵanyn aıtqan adamǵa qansha qarjy beriledi

NUR-SULTAN. QazAqparat – Ózine para usynylǵanyn habarlaǵan adamǵa 30 AEK jáne odan joǵary kólemde syıaqy beriledi. Bul týraly QR Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov aıtty, dep habarlaıdy QazAqparat tilshisi.

«Máselen Aqmola oblysyndaǵy túzeý mekemesinde jedel ýákilge para bergeni úshin kináli dep tanyldy. Ol jazany óteý jaǵdaıyn jaqsartý masqatynda 300 myń teńge para bermek bolǵan. Jedel ýákilge 50 AEK (nemese 126 250 teńge) aqshalaı syıaqy berildi», - dedi Danııar Bekaıdarov agenttiktiń búgingi «Antıkor LIVE» aıdarynda.

Osyǵan uqsas jaǵdaı Shyǵys Qazaqstanda da tirkelgen. 156/18 túzeý mekemesinde jazasyn óteýshilerdiń biri baqylaýshydan túrmede uıaly telefon ustaýǵa ruqsat berý úshin para usynǵan. Alaıda baqylaýshy bul jaıly jemqorlyqqa qarsy kúres qyzmetkerlerine habar berip, sottalǵan adamnyń jazasyna taǵy 4 jyl qosylǵan. Sot úkimi kúshine engennen keıin baqylaýshyǵa da aqshalaı syıaqy berilgen.

«Qazirgi jaǵdaıda qoǵamnyń demeýine arqa súıep, osyndaı qylmystardyń betin asha alamyz. Halyq belsendi bolǵan kezde ǵana jemqorlyqpen kúres tıimdiligin kórsetedi», - deıdi ol.