Ózin-ózi jumyspen qamtýshylar jumyssyzdardyń qataryna jatqyzylatyn bolady - B. Nurymbetov
Komıtet otyrysynda «Jumyspen qamtý týraly» jańa zań jobasy talqylanǵan bolatyn. Zań jobasy birinshiden, jańa Eńbek kodeksiniń, kóshi-qon týraly jáne mindetti medıtsınalyq saqtandyrý týraly zańnamalardyń kúshine enýmen qatar, ataýly áleýmettik kómektiń jańa formatyna kóshýge baılanysty ázirlenip otyr. Bunymen qosa, qoldanystaǵy jumyspen qamtý týraly zańnama 2001 jyly qabyldanǵandyqtan, ondaǵy normalar jańa zamanaýı talaptarǵa saı kelmeıdi.
Vıtse-mınıstrdiń aıtýynsha, qujatta kózdelgen basty maqsat - Qazaqstannyń damyǵan otyz eldiń qataryna kirý mindetin júzege asyrýdy qamtamasyz etý.
«Osyǵan baılanysty Qazaqstan damyǵan elderdiń standarttaryna birtindep kóshe bastaıdy. Bul rette Halyqaralyq eńbek uıymynyń zamanaýı ustanymdary boıynsha eńbek naryǵyndaǵy kórsetkishterge ózgerister engiziledi. Máselen, biz birinshi kezekte eńbek naryǵynda qoldanylatyn ataýlardy aýystyratyn bolamyz. Buǵan sáıkes, qazir qoldanylyp júrgen «ekonomıkalyq turǵydan belsendi halyq» termınin «jumys kúshi» dep ataıtyn bolamyz. Al «ekonomıkalyq turǵydan enjar halyq» «jumys kúshine enbeıtinder» dep atalady. Maǵynasyna kelsek, bizde jumyspen qamtylǵan azamattar ishinde «jaldamaly jumysshylar», «ózin-ózi jumyspen qamtyǵandar» degen toptar bar. Bular da jańa talapqa sáıkes ózgeretin bolady», - dedi B. Nurymbetov.
Onyń aıtýynsha, jańa kórsetkishterge sáıkes, «ózin-ózi jumyspen qamtyǵandar» sanatynyń arajigi ajyratylady. Máselen, atalǵan sanattyń ishinde jeke qosalqy sharýashylyǵynda óndirispen aınalyspaıtyn, odan paıda tappaıtyndar bar. «Jańa talap boıynsha bul azamattar jumyspen qamtylǵandardyń qatarynan shyǵarylyp, olar ne «jumyssyz» ne bolmasa «jumys kúshine enbeıtin tulǵalar» degen sanatqa jatqyzylatyn bolady», - dedi B. Nurymbetov.