Ózin ózi qamtamasyz etetin orta tap pen tıimdi ekonomıka qalyptastyramyz – Toqaev

NUR-SULTAN. QazAqparat – Elimizdiń ornyqty damýynyń negizgi qozǵaýshy kúshi - eńbek, bilim jáne azamattyq belsendilik bolýǵa tıis. Tek sonda ǵana ózin-ózi qamtamasyz etetin orta tap pen tıimdi ekonomıka qalyptastyra alamyz. Bul týraly Prezıdent Qasym-Jomart Toqaev Qazaqstan halqyna úndeýinde aıtty, dep habarlaıdy QazAqparat tilshisi.

«Dáıekti saıası jańǵyrý ulttyq ekonomıkany damytýǵa, ulttyq kásipkerlikti nyǵaıtýǵa yqpal etedi. Endi bizdiń aldymyzda ashyq ári ádiletti ekonomıka quryp, zańnamaǵa reforma júrgizý mindeti tur. Qoldan jasalǵan monopolııalardy túbegeıli joıyp, sybaılas jemqorlyqqa tosqaýyl qoıý mańyzdy», - dep atap ótti Prezıdent.

Memleket basshysy kásipkerlerdiń bastamalaryna qoldaý kórsetip, jekemenshikti saqtap, básekelestikti kúsheıtý kerektigin aıtty.

«Aldymyzda ekonomıkany shynaıy ártaraptandyrý boıynsha aýqymdy jumystar tur. Joǵary ónimdi aýyl sharýashylyǵy men qýatty kólik-logıstıka júıesin damytý, barlyq salada tsıfrlyq ekojúıe qalyptastyrý úshin sharalar qabyldaý qajet. Elimizdiń ornyqty damýynyń negizgi qozǵaýshy kúshi - eńbek, bilim jáne azamattyq belsendilik bolýǵa tıis. Tek sonda ǵana ózin-ózi qamtamasyz etetin orta tap pen tıimdi ekonomıka qalyptastyra alamyz. Bundaı ekonomıka kiristi ádiletti bólýge, sapaly jumys ornyn ashýǵa, turmys sapasyn turaqty arttyrýǵa jáne barlyq azamattardyń tolyqqandy jetilýine múmkindik beredi», - dedi Qasym-Jomart Toqaev.