Ózin bankrot dep jarııalaǵandar 5 jyl boıy nesıe ala almaıdy – mınıstrlik

ASTANA. QazAqparat – Bankrot mártebesin alǵan azamattar bes jyl boıy nesıe ala almaıdy. Bul aqparatty Qarjy vıtse-mınıstri Erjan Birjanov rastap otyr, habarlaıdy QazAqparat tilshisi.

«Nazarǵa sala ketsek, sotsyz bankrot dep tanylǵan azamattar sol kúnnen bastap bes jyl ishinde bankter men mıkroqarjy uıymdarynan kredıt ala almaıdy», – dedi Erjan Birjanov ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń aıtýynsha, sotsyz bankrot dep tanylmaǵan azamattar araǵa 3 aı salyp qaıta ótinish bere alady.

«Azamattardyń jeke málimetteri boıynsha derekter bazasyna quzyrly memlekettik organdar jaýapty ekenin eske salǵym keledi. Joǵarǵy sottyń málimetterine sáıkes búginde tólem qabilettiligin qalpyna keltirý nemese bankrottyqty sot arqyly rásimdeý týraly 139 tulǵa ótinish bildirip, aryz bergen», - deıdi ol.

Eske salsaq, 3 naýryzda elimizde bankrottyqqa ótinim qabyldaý bastaldy.

Spıker keltirgen statıstıkaǵa sáıkes, búgingi jaǵdaı boıynsha 34 myńnan astam qazaqstandyq ózin bankrot dep jarııalaýǵa ótinish bergen.

Sondaı-aq, brıfıng barysynda 7 myńnan asa azamattyń bankrottyqqa bergen ótinishi qanaǵattandyrylmaǵany aıtyldy.