Ózimdi belsendi qala turǵyndarynyń qataryna qosamyn - Baqyt Sultanov

NUR-SULTAN. QazAqparat - Nur-Sultan qalasynyń eks-ákimi Baqyt Sultanov áleýmettik jelidegi jazbasynda elorda jurtyna alǵys aıtty, dep habarlaıdy QazAqparat.

«Bul laýazymdy bosatyp, kezekti «shaqyrtýǵa» attanatyn kún de jetti. Kózdi ashyp-jumǵansha toǵyz aı óte shyqty. Toǵyz aıda sábı de dúnıege keledi. Osy ýaqyt ishinde ózim 20 jyldan astam turyp kele jatqan qalanyń sharýashylyǵy qanshalyqty kúrdeli ekenin, osynda ómir súrip, jumys istep jatqan jáne munda jaqsy ómir tabýǵa umtylǵan adamdardyń taǵdyry men armany alýan túrli ekenin túsindim. Osy aılarda turǵyndarmen óte kóp kezdestim, aldanǵan úleskerler, kópbalaly analar, múmkindigi shekteýli balalary bar otbasylardyń máselelerin sheshýge tyrystym. Kóptegen áleýmettik nysandar men tirshilikpen qamtamasyz etý uıymdaryna bardym», - dep jazdy ol Facebook-tegi paraqshasynda.

B.Sultanovtyń aıtýynsha, ol kóptegen túıtkilderdiń sheshimi barlyq deńgeıdegi bıliktiń jumyla kirisýiniń nátıjesinde múmkin ekenin túsingen.

«Árbir isti júzege asyrýdy sozbalaý, árıne bolashaq úshin utymy joq. Sondyqtan da men jyldam ári biregeı sheshim qabyldaýǵa tyrystym. Alaıda, sheshimder siz ben bizdiń bárimizdiń oıymyzdaǵydaı nemese der kezinde bola qoımaǵan bolsa keshirim ótinemin.
Biraq balalarym men nemerelerim ósip jatqan qalaǵa degen sezimim kúsheıe tústi. Qyzmetimniń ereksheligine qaraı ótken 20 jyl ishinde qalanyń on paıyzyn da kórmegen ekenmin. Qalanyń shet-shetin aralap, máselelerdi sheshýge erekshe kóńil bólgenimnen keıin, «aǵashtyń japyraǵyna qarap, ormandy kórý kerek, al ormanǵa qarap, ondaǵy japyraqty kóre bilý qajet» degen eski danalyqty erekshe túsindim. Sondyqtan qaıda bolsam da, qandaı laýazymda bolaıyn, men ózimniń súıikti qalamnyń máselelerin sheshýge jáne qarqyndy damýyna árqashan kómektesýge tyrysamyn. Óıtkeni, biz álemdik astanalardyń biri bolýyna umtylamyz», - dedi ol.

Sondaı-aq, B.Sultanov qala turǵyndaryna alǵys aıtty.

«Búginnen bastap men ózimdi belsendi ári «tájirıbeli» qala turǵyndarynyń qataryna qosamyn. Men elorda basshysy qyzmetinde bolǵan kezde maǵan qoldaý kóretken, aldyma kúrmeýli máseleni aıtyp, sheshimin talap etken barshańyzǵa zor alǵysymdy bildiremin. Bul men úshin asqan jaýapkershilikke toly tájirıbe boldy», - dedi ol.

Eske sala ketsek, búgin QR Prezıdenti Qasym-Jomart Toqaevtyń Jarlyǵymen Altaı Kólginov Nur-Sultan qalasynyń əkimi bolyp taǵaıyndaldy.

B. Sultanov elorda əkimdiginiń basshylyǵyna 2018 jyldyń 11 shildesi kúni kelgen bolatyn.