Ózge ult jastary Abaıdyń óleńderin jatqa oqydy

ShYMKENT. QazAqparat – Shymkenttegi Aımaqtyq-áleýmettik ınnovatsııalyq ýnıversıtetinde «Táýelsizdik dep soǵady júregim» atty is-shara ótti. Atalǵan jıyn elimizdiń Táýelsizdik merekesi men qazaqtyń bas aqyny Abaıdyń 175 jyldyǵyna oraı uıymdastyryldy, dep habarlaıdy QazAqparat tilshisi.

Saltanatty sharada ýnıversıtette bilim alatyn ózbek ultynyń stýdentteri uly Abaıdyń óleńderin jatqa oqyp, sahnalyq qoıylymdar usyndy. Bıyl Qazaqstannyń Ózbekstandaǵy jyly qorytyndylanýyna sáıkes eki eldiń ánderin shyrqap, óz ónerlerin pash etti. Ýnıversıtet rektorynyń tárbıe isi jónindegi orynbasary Nurbol Ábsemetov sharaǵa jınalǵan jastar men qonaqtardy Uly dala eliniń ulyq merekesi - Táýelsizdik merekesimen quttyqtady. «Osyndaı eldik merekeniń mańyzy Qazaqstan men Ózbekstan arasyndaǵy tatýlyqtan-aq kórinis tabary sózsiz. Eki el Memleket basshylarynyń arasyndaǵy túrli memorandýmnyń nátıjesinde bıyldyń ózinde Shymkent qalasyna 10 myńǵa jýyq stýdent oqýǵa keldi. Sonyń birshamasy bizdiń oqý ornynda bilim alýda. Olar sabaqtan tys ýaqytta ýnıversıtetimizdiń janynan ashylǵan «Til úıretý ortalyǵynda» qazaq tili kýrsyn oqıdy», - dedi Nurbol Ábsemetov. Atalmysh ýnıversıtettiń «Til úıretý ortalyǵynyń» meńgerýshisi Erlan Qudaıbergenov bolsa ózbek stýdentteri qazaq tili kýrsynda oqyǵanyna nebári úsh aıdyń júzi bolǵanymen, sahnada kórsetken óneri men mánerlep oqyǵan óleńine qarap joǵarǵy baǵa berýge bolatynyn aıtyp ótti. Іs-shara sońy kontserttik baǵdarlamaǵa ulasty.