Ózge ult ókilderi qazaq tiliniń latyn qarpine ótýi zaman talaby dep sanaıdy - OQO
«Qoǵamdyq kelisim» mekemesiniń ǵımaratynda ótken keńestiń otyrysyna keńes músheleri men oblystaǵy etnomádenı birlestikterdiń tóraǵalary jáne assambleıa janyndaǵy Qoǵamdyq kelisim keńesi, Analar keńesi, ǵylymı-sarapshylyq top pen oblystyq máslıhattaǵy «El birligi» depýtattyq tobynyń jetekshileri men beldi ókilderi qatysty. Basqosýǵa kelgen mádenı ortalyqtyń ókilderi qazaq tiliniń latyn qarpine ótýi zaman talaby men órkenıet suranysy ekendigin aıtyp, baıypty bastamanyń negizgi artyqshylyqtaryna keńinen toqtaldy. Otyrys barysynda OQO QHA tóraǵasynyń orynbasarlary oblystyq koreı etnomádenı birlestiginiń tóraıymy Roza Pak pen oblystyq grýzın etnomádenı birlestiginiń tóraǵasy Zaal Bochorıshvılı, Qazaqstandaǵy ózbekter qoǵamdyq birlestikteri «Dýstlık» qaýymdastyǵynyń jetekshisi Ikramjan Hashımjanov, oblystyq qoǵamdyq kelisim keńesiniń múshesi Baıdýlla Qonysbek, oblystyq Analar keńesiniń tóraıymy Balhııa Kómekbaeva, oblystyq ardagerler keńesiniń tóraǵasy, qoǵamdyq kelisim keńesiniń múshesi Jeńisbek Máýlenqulov, OQO QHA janyndaǵy ǵylymı-sarapshylyq toptyń jetekshisi, professor Asma Qalybekova sóz sóılep, elimizde ýaqtyly qolǵa alynǵan bastamany biraýyzdan qoldaıtyndyqtaryn jetkizdi. Tilderdi damytýdyń respýblıkalyq úılestirý-ádistemelik ortalyǵy usynǵan qazaq tiliniń latyn grafıkasyna negizdelgen əlipbı jobasyn osyndaı otyrystar men jıyndarda jan-jaqty saralap, taldap, talqylaýǵa shaqyrdy.
Sondaı-aq búginde ulttyq qarip júıesine reforma júrgizgen Ázerbaıjan, Túrkimenstan, Ózbekstan sekildi burynǵy odaqtas respýblıkalardyń tájirıbelerin zerdelep, olardyń kemshilikterinen sabaq alýǵa bolatyny aıryqsha atap ótildi. Basqosýǵa qatysýshylar jańa álipbı boıynsha túsindirý jumystaryna barynsha basymdyq berý kerek degen ýájge toqtady.