Ózge eldiń shańyn jutý bizdiń jolymyz emes - Nazarbaev
«Biz búkil álemdegi daǵdarysqa, nashar jaıttarǵa qaramastan toqtamastan damyp jatqanymyzdy, alyp kásiporyndardy iske qosatyndyǵymyzdy aıtamyz. Jańa jumys oryndaryn, zamanaýı zaýyttar, qaıta óńdeý oryndaryn qurýdamyz. Álemde munymen qazir kim aınalysýda. Qandaı memleket? Ondaılar joq. Demek, biz uly bolýǵa umtylǵan elmiz. Onyń halqy da uly, onyń búkil ókili sizder osynda otyrsyzdar», - dedi Memleket basshysy.
Elbasy tek aýqymdy ındýstrıalandyrý ǵana elimizdi álemniń damyǵan 30 eliniń qataryna qosatyndyǵyn basa aıtty.
«Bizdiń basty maqsatymyz - arman. Adamnyń armany bolǵan kezde ol eshýaqytta qartaımaıdy. Armanmen ómir súrý qajet. Sol armanǵa qaraı jyljý qajet. Arman óte úlken bolýy tıis. Eger tipti ortasyna deıin jeter bolsań, onda zor tabystarǵa kenelesiń. Birinshi kezekte muny jastarǵa aıtyp otyrmyn. Bul bizdiń 25 jyldyǵymyzdyń qarsańyndaǵy mańyzdy sharalardyń biri boldy. Mindetter jańa, eger men ony aldaryńa qoısam, jumys isteıik», - dedi Nazarbaev.
QR Prezıdenti patshalyq Reseı kezinde qazaqtyń jer qoınaýynyń barlyq baılyǵy shıkizat kúıinde syrtqy tasymaldanǵanyn, tipti elimizdiń ishinde joldardyń da bolmaǵanyna erekshe toqtalyp ótti.
«Al qazir qarańyzdarshy, qandaı temir joldy iske qostyq. Buryn mundaı bolǵan emes. Óıtkeni, biz kolonııa boldyq. Munaı, gaz, altyn, kúmis - qudaıǵa shúkir bizde bar. Bul bizdiń qaltamyzdaǵy baılyǵymyz. Ony eshkim ala almaıdy. Biz ózge elderdiń shańyn jutpaýymyz qajet. Bul bizdiń jolymyz emes», - dedi Elbasy.