Ózge eldermen salystyrǵanda Qazaqstanda eńbekaqy tóleýdiń úlesi tómen

NUR-SULTAN. QazAqparat – Ózge eldermen salystyrǵanda qazaqstandyqtarǵa eńbekaqy tóleýdiń úlesi tómen. Bul jaıynda Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

Jalaqy tóleýdegi sáıkessizdikti eńbek naryǵyna júrgizilgen saraptama kórsetken.

«2021 jyly jalpy ishki ónim qurylymynda ózge eldermen (Reseıde – 46,7, Belarýsta – 49,7, Eýropalyq odaqta 47,9 paıyz) salystyrǵanda jumysshylarǵa eńbekaqy tóleýdiń tómen úlesi baıqalady – 30,9 paıyz. Bul eńbekaqy tóleýdegi sáıkessizdikke, jasyryn jumyssyzdyqtyń bolýyna jáne sonyń saldarynan jumys isteıtin kedeılerdiń (Qazaqstanda - 32,7, Ázerbaıjanda – 39,7, Reseıde - 30,7, Grekııada – 13,4 paıyz) artýyna negizdeledi», - delingen Úkimet basshysynyń jaýabynda.

Onyń atap ótýinshe, saraptamalyq jumystardy júrgizýge jáne onyń qorytyndylaryn talqylaýǵa «Ekonomıkalyq zertteýler ınstıtýty» AQ, «Atameken» UKP sarapshylary, ekonomıka salasyndaǵy táýelsiz sarapshylar qatysqan.

«Saraptamalyq jumystyń qorytyndysy múddeli taraptardyń, sondaı-aq Parlament depýtattarynyń qatysýymen 2025 jylǵa deıin halyqtyń tabysyn arttyrý baǵdarlamasyn ázirleý jónindegi turaqty jınalystarda birneshe márte talqylandy», - deıdi Álıhan Smaıylov.