«Ózenmunaıgazdyń» qarjy-sharýashylyq qyzmetinde 160 zań buzýshylyq anyqtaldy
Kompanııa málimetinshe, Jańaózen qalasynda QMG arnaıy jumys toby tekseris júrgizýdi jalǵastyryp jatyr. Qazirgi ýaqytta 55 sharýashylyq qyzmet nysany, onyń ishinde «Ózenmunaıgaz» AQ-tyń 17 óndiristik qurylymdyq bólimshesi, 8 munaı servıs uıymy men 30 basqa da merdiger uıymnyń qyzmeti taldandy. ÓMG-niń qarjy-sharýashylyq qyzmetin tekserý kezinde aldyn ala 160 buzýshylyq pen sáıkessizdik anyqtaldy. Onyń ishinde 7 fakti QR zańnamasyna saı sharalar qabyldaý úshin quqyq qorǵaý organdaryna jiberildi. 10 fakti boıynsha qyzmettik tergeý júrip jatyr. 101 fakti boıynsha jaýapty tulǵalarǵa tártiptik jaza qoldanylatyn bolady.
Quqyq buzýshylyq faktileriniń saldarynan keltirilgen shyǵyn somasy protsessýaldy jáne reglamentteýshi is-sharalardyń qorytyndysy boıynsha anyqtalady.
«Biz quqyq qorǵaý organdarymen tyǵyz jumys istep, zańǵa qaıshy anyqtalǵan áreketter jaıly der kezinde habarlap otyrmyz. Budan ári olar tergeý júrgizip, ózge is-sharalardy qolǵa alady. Solardyń birine keshe Ekonomıkalyq tergeý departamentiniń «Ózenmunaıgaz» bas dırektorynyń orynbasaryn ustaý faktisi de jatady. Komıssııanyń jumysy áli aıaqtalmady, kóptegen fakt boıynsha qyzmettik tergeýler júrip jatyr», - dedi arnaıy jumys tobynyń jetekshisi, QMG Basqarma tóraǵasynyń orynbasary Dáýletjan Hasanov.