Ózbekstannyń kommertsııalyq bankterinde AQSh dollarynyń baǵamy 12 myń sýmnan asty

TAShKENT. QazAqparat – Búgin Ózbekstan bankterindegi AQSh dollarynyń baǵamy 400 sýmǵa kóterilip, 12 myń sýmnan asty, dep habarlaıdy QazAqparat menshikti tilshisi.

Ózbekstan Ortalyq bankiniń málimeti boıynsha, 11 tamyzda dollar baǵamy bir kúnde 408,03-ke ósip, 12075,03 sým bolǵan.

«Negizgi saýda áriptes elderdiń ulttyq valıýtasynyń aıtarlyqtaı qunsyzdanýy syrtqy saýda jáne aqsha aýdarymdary arqyly sýmnyń naqty tıimdi aıyrbas baǵamynyń nyǵaıýyna ákeldi. Bul óz kezeginde, valıýtalyq túsimderge jáne elge eksporttyq arnalar men aqsha aýdarymdary boıynsha ishki valıýta naryǵyndaǵy shetel valıýtasyn usyný kólemine keri áserin tıgizdi», - dep túsindirdi Ortalyq bank.

Nátıjesinde ishki valıýta naryǵynda sým baǵamynyń qunsyzdaný qarqyny jedeldedi. Qarjy retteýshisi bolashaqta valıýta baǵamynyń kúrt qunsyzdanýyn boldyrmaý úshin jetkilikti quraldardyń bar ekenine jáne qajet bolǵan jaǵdaıda qosymsha ınterventsııalar júrgizý arqyly turaqsyzdyqty jeńildetemiz dep sendirdi.

«Bul túzetý naqty tıimdi aıyrbas baǵamynyń uzaqmerzimdi trendine oralýǵa ákeledi, al teńgerimdi aıyrbas baǵamy valıýtalyq túsimderdiń artýy esebinen naryqtaǵy usynystyń ulǵaıýyna qyzmet etedi. Naqty tıimdi aıyrbas baǵamy jyl sońyna deıin jáne ortamerzimdi perspektıvada salystyrmaly túrde turaqty bolady», - dep tolyqtyrdy vedomstvodan.