Ózbekstannyń erler quramasy tuńǵysh ret shahmat olımpıadasynyń jeńimpazy atandy

TAShKENT. QazAqparat – Ózbekstannyń erler quramasy Úndistannyń Chennaı qalasynda ótken shahmat olımpıadasynyń aqtyq kezeńinde Nıderland quramasyn jeńip, tarıhta tuńǵysh ret týrnır chempıony atandy. Bul týraly Ózbekstan shahmat federatsııasynyń prezıdenti Álisher Sadýllaev Telegram arqyly málimdedi, dep habarlaıdy QazAqparat menshikti tilshisi.

Búgin 44-shi shahmat olımpıadasynyń sońǵy 11-týrynda Ózbekstan Nıderland quramasyn 2,5:1,5 esebimen jeńdi. Grossmeısterler Nodırbek ıAkýbboev, Djavohır Sındarov jáne Nodırbek Abdýsattorov óz qarsylastarymen teń oıyn júrgizdi. Sheshýshi kezdesýde Jahongır Vahıdov Maks Ýorderdamdy jeńip, eldiń ulttyq quramasyna olımpıadanyń tuńǵysh altyn medalin áperdi.

«Taǵy bir tamasha jańalyq: Ózbekstan quramasy osy Olımpıadada birde-bir jeńilis kórmegen jalǵyz komanda boldy. Barsha otandastarymyzdy tarıhı jeńisimen quttyqtaımyn!» - dep jazdy Álisher Sadýllaev.

44-shi Dúnıejúzilik shahmat olımpıadasy 29 shilde men 9 tamyz aralyǵynda Úndistannyń Chennaı qalasynda ótti. Jabylý saltanaty erteń, 10 tamyzda bolady.

Buǵan deıin dúnıejúzilik shahmat olımpıadasy 2026 jyly Ózbekstanda ótetini habarlanǵan bolatyn. Respýblıka bul jarysty alǵash ret ótkizedi. Olımpıada ótkizilýi múmkin qalalar – Tashkent nemese Samarqan.

Foto: t.me/alisher_sadullaev