Ózbekstannyń energetıka salasy tótenshe jaǵdaı rejımine kóshedi

TAShKENT. QazAqparat - Kúzgi-qysqy kezeńde energetıkalyq júıeniń turaqty jumysyn qamtamasyz etý úshin Ózbekstannyń energetıka salasy tótenshe jumys rejımine kóshedi. Bul jaıynda Ózbekstan prezıdenti Shavkat Mırzıeev energetıka máselelerine arnalǵan beınekonferentsııada aıtty, dep habarlaıdy QazAqparat tilshisi respýblıka basshysynyń baspasóz qyzmetine silteme jasap.

Jıyn barysynda energetıkalyq keshen basshylary men ákimderge júıeniń turaqty jumys isteýin qamtamasyz etý boıynsha birqatar tapsyrma berildi.

Osylaısha, ekinshi jartyjyldyqta 30 mlrd tekshe metr gaz, 41 mlrd kılovatt-saǵat elektr qýatyn óndirý, olardy tutynýshylarǵa úzdiksiz jetkizý, jerasty gaz qoımalaryndaǵy gaz qoryn kem degende 3,5 mlrd tekshe metrge ulǵaıtý tapsyryldy.

Sondaı-aq 1 qazanǵa deıin 1,1 myń shaqyrym jeli men 402 transformatordy jóndeý, kúzgi-qysqy kezeńde halyqty jáne áleýmettik nysandardy 335 myń tonna suıytylǵan gazben úzdiksiz qamtamasyz etý mindeti qoıyldy.

Odan bólek, jyl sońyna deıin 400 myń tonna benzın óndirip, 120 myń tonnasyn ımporttaý qajet.

Prezıdent energetıkalyq keshen basshylyǵyna oblys ákimderimen jáne sala basshylarymen birlesip, jyl sońyna deıin 3,7 mlrd kılovatt-saǵat elektr energııasyn jáne 2,4 mlrd tekshe metr gazdy únemdeýdi tapsyrdy.

Áleýmettik nysandar men memlekettik mekemelerge taǵy 250 megavatt kún batareıasyn ornatýdyń mańyzy aıtyldy.

«Kúzgi-qysqy kezeńde energetıka júıesiniń turaqty jumysyn qamtamasyz etý úshin jaýapty basshylar búginnen bastap shuǵyl jumys rejımine kóshedi», - dedi Shavkat Mırzıeev.

Buǵan deıin habarlanǵandaı, Ózbekstanda qańtar aıynda bolǵan qatty aıaz barlyq jyldardaǵy meteorologııalyq baqylaýlardyń absolıýtti rekordyn jańartty.

Qatty sýyqta respýblıka aýqymdy energetıkalyq daǵdarysqa tap boldy.

Ózbekstan basshysy qysqa daıyndyqtyń nasharlyǵy úshin birqatar joǵary laýazymdy sheneýnikterdi qyzmetinen bosatty.