Ózbekstannyń jalpy ishki ónim kólemi alǵash ret $100 mlrd asty

<p>TAShKENT. KAZINFORM &ndash; Keıingi 5 jylda Ózbekstannyń JІÓ eki ese ósip, 100 mlrd dollardan asty. Bul týraly Olıı Majlıstiń Zań shyǵarý palatasy depýtattarynyń aldynda sóz sóılegen Ózbekstan prezıdenti Shavkat Mırzıeev málimdedi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.</p>

Ózbekstan basshysynyń aıtýynsha, eksport kólemi tuńǵysh ret 25 mlrd dollardan asyp, byltyrǵy rekordty jańartty. 2023 jyly kórshiles el 24,4 mlrd dollardyń taýaryn ózge naryqtarǵa shyǵarǵan edi.

Foto: Ózbekstan prezıdentiniń baspasóz qyzmeti

Shavkat Mırzıeev óz baıandamasynda taıaýda jan basyna shaqqandaǵy jalpy ishki ónim kólemi 3 myń dollarǵa teńeletinin atap ótti.

«Dúnıejúzilik banktiń bıylǵy boljamyna saı, Ózbekstan Eýropa men Ortalyq Azııanyń eń jyldam damyp kele jatqan ekonomıkalarynyń úshtigine enedi. Ózbekstan ekonomıkasynyń damýyna 5 jyl ishinde tartylǵan sheteldik ınvestıtsııa kóleminiń 6 esege artýy yqpal etti. Onyń nátıjesinde 1,5 mln-ǵa jýyq tabysy joǵary jumys oryndary quryldy», - dedi Ózbekstan prezıdenti.

Qosa keteıik, Zań shyǵarý palatasy depýtattarynyń aldynda sóılegen sózinde Shavkat Mırzıeev ózbek tarapy Qazaqstan men Tájikstan shekarasynan ID-kartamen ótý tártibin engizýdi josparlap otyrǵanyn aıtty.

Eske salsaq, keshe Ózbekstan úkimeti otstavkaǵa ketti. Búgin Shavkat Mırzıeev jańa premer-mınıstrdiń kandıdatýrasyn depýtattarǵa usynyp jatyr.

Buǵan deıin habarlaǵanymyzdaı, Ózbekstan 2030 jylǵa qaraı jalpy ishki ónim kólemin $200 mlrd jetkizýdi josparlap otyr.