Ózbekstannan kelgen 6 adamnan koronavırýs anyqtaldy
Oblystyq taýarlar jáne qyzmetterdiń sapasy men qaýipsizdigin baqylaý departamentiniń basshysy Nurbek Nyshanovtyń aıtýynsha, 6 qazannan beri shekaradan ótken azamattardan vırýs týraly anyqtamasy talap etilýde. Anyqtama bolmaǵan jaǵdaıda eki kúndik karantınge jatqyzylýda. Olardan arnaıy synamalar alynyp, búginde 406 adam statsıonarlyq karantınge ornalastyrylǵan. Onyń ishinde 6 adamnan koronavırýs anyqtalǵan. Klınıkalyq kórsetkish boıynsha bir naýqas aýrýhanaǵa jatqyzylǵan. 5 adamda aýrý sımptomsyz bolǵandyqtan, úı jaǵdaıynda emdelýge jiberilgen. Óńirde sońǵy táýlikte qaýipti indet 1 adamnan anyqtalyp, 1500 adam ptsr testtileýden ótkizilgen.
«Osy indettiń aldyn alý úshin keshegi táýlikte 1530 adam tekserilip, onyń ishinde bir jaǵdaıda anyqtalyp otyr.Oblys kóleminde zerthanalardyń qýattylyǵy 1470 bolsa, qosymsha taǵy 5 zerthana jumysqa qosylý ústinde»,- deıdi Nurbek Nyshanov.
Departament basshysynyń aıýynsha, oblys kóleminde qurylǵan 53 mobıldik top karantındik talaptardy saqtaýǵa qatysty reıdtik sharalardy turaqty túrde júrgizýde. Osynaý tekserýler kezinde erejeni eskermeýdiń 2987 jaǵdaı tirkelip, olarǵa qatysty 150 mln teńgeden asa aıyppul salynǵan. 9 laýazymdy jáne 10 zańdy tulǵaǵa, sondaı-aq 75 kásipkerge qatysty ákimshilik is qozǵalǵan. Salynǵan aıyppuldardyń 125 mln teńgesi bıýdjetke óndirilip, karantın kezinde toı jasaýshylarǵa da tıisti sharalar qoldanylǵan.