Ózbekstanmen saýda-ekonomıkalyq yntymaqtastyqty nyǵaıtý máseleleri talqylandy

​​ASTANA. QazAqparat – Qazaqstan Premer-Mınıstri Álıhan Smaıylov Ózbekstan Premer-Mınıstriniń orynbasarlary Jamshıd Hodjaevpen jáne Jýrabek Myrzamahmýdovpen saýda-ekonomıkalyq yntymaqtastyqty nyǵaıtý máselelerin talqylady. Bul týraly QazAqparat Úkimettiń baspasóz qyzmetine silteme jasap habarlaıdy.

Kezdesý barysynda Álıhan Smaıylov Ózbekstan Qazaqstannyń Ortalyq Azııa óńirindegi negizgi saýda-ekonomıkalyq áriptesi bolyp tabylatynyn atap ótti. Ótken jyldyń qorytyndysy boıynsha ekijaqty taýar aınalymy shamamen 33%-ǵa ósti. Bıyl da oń dınamıka saqtalyp otyr.

Sondaı-aq, Premer-Mınıstr memleketter arasyndaǵy ekonomıkalyq yntymaqtastyqty nyǵaıtýǵa Qazaqstan-Ózbekstan Úkimetaralyq komıssııasy men Óńiraralyq yntymaqtastyq forýmy eleýli úles qosyp otyrǵanyn aıtty.

Jamshıd Hodjaev atap ótkendeı, Qazaqstan Ózbekstan úshin strategııalyq seriktes bolyp tabylady, sondyqtan el basshylyǵy keshendi ózara is-qımyldy odan ári nyǵaıtýǵa daıyn.

«Kooperatsııa qarqynyn arttyrýymyz kerek. Eger strategııalyq kooperatsııalyq jobalarymyz kóp bolsa, bul bıznesti damytýǵa jáne saýdadaǵy kedergilerdi joıýǵa serpin beredi. Jalpy, ózara taýar aınalymyn ulǵaıtý baǵytynda jumys isteýge daıynbyz», - dedi Jamshıd Hodjaev.

Foto: t.me/KZgovernment