Ózbekstanǵa baratyn sheteldik týrıster 9 mln-ǵa deıin ósýi múmkin

TAShKENT. QazAqparat - Ózbekstan 2026 jylǵa qaraı sheteldik týrıster sany 9 mln adamǵa jetedi dep boljap otyr. Bul týraly búgin VI «Ózbekstan gıdter forýmy – 2023» aıasynda Ózbekstan Mádenıet jáne týrızm mınıstriniń keńesshisi Shavkatjon Ortıkov málim etti, dep habarlaıdy QazAqparat tilshisi.

«Ózbekstanda saıahatta» baǵdarlamasy aıasynda otandyq týrıster sanyn 12 mln adamǵa, al sheteldik týrıster sanyn 9 mln adamǵa jetkizý boıynsha ózekti mindetter qoıyldy», - dedi Sh.Ortıkov.

Onyń aıtýynsha, osy maqsattarǵa qol jetkizý úshin el qalalarynda kedergisiz týrızm sharalary keńinen júzege asyrylýda. Bul 2026 jylǵa qaraı týrızm salasynda jumyspen qamtylǵandar sanyn 2 ese, ıaǵnı 520 myń adamǵa deıin arttyrýǵa múmkindik beredi. Týrızm salasyndaǵy mádenı-oıyn-saýyq ınfraqurylymyna kezeń-kezeńimen kiriktiriletin 8 myń mádenı mura nysandaryn qalpyna keltirý jáne abattandyrý jumystary jalǵasýda. Zaamın, Farısh, Bahmal aýdandary men Aıdar-Arnasaı kólder júıesinde qosymsha týrıstik aımaqtardy damytý boıynsha 300 mln dollar somasyna jobalar júzege asyrylýda. Bul 25 myń jańa jumys ornyn qurýǵa múmkindik beredi.

Aıta ketsek, buǵan deıin Ózbekstanda jańa jyldyń alǵashqy aıynda sheteldik týrıster aǵyny 2,5 ese óskeni habarlanǵan bolatyn. Ótken jyly kórshi respýblıkaǵa 1,5 mln-nan astam qazaqstandyq bardy. Bul Ózbekstandaǵy týrıstik aǵynnyń úshten birine jýyǵyn qurady.

Foto: pinterest.com