Ózbekstanǵa 83 mln teńge alyp ushpaq bolǵan jolaýshy toqtatyldy

ASTANA. QazAqparat – Astana áýejaıynda keden qyzmetkerleri 83 mln teńgeden astam deklaratsııalanbaǵan qolma-qol qarajatty shetelge alyp ushpaq bolǵan jolaýshyny toqtatty. Bul týraly QazAqparat Memlekettik kirister komıtetine silteme jasap habarlaıdy.

«Astana qalasy boıynsha Memlekettik kirister departamentiniń «Áýejaı-Astana» keden beketiniń qyzmetkerleri 6 qarashada «Astana-Tashkent» halyqaralyq reısi jolaýshylarynyń qol júgin kedendik tekserý kezinde Qazaqstan Respýblıkasynyń azamattarynan deklaratsııalanbaǵan 83 601 000 teńge kóleminde, atap aıtqanda 180 000 AQSh dollaryn (qolma-qol qarajat) anyqtady. Kedendik tekserý kezinde zań buzýshylar laýazymdy tulǵalarǵa kedergi keltirgen. Zań buzýshylarǵa qatysty materıaldar Qazaqstan Respýblıkasy Qylmystyq kodeksiniń 234-baby boıynsha qylmystyq is qozǵaý týraly sheshim qabyldaý úshin Astana qalasynyń Ekonomıkalyq tergeý departamentine jiberildi», - delingen Komıtet habarlamasynda.

Aıta ketsek, QR Prezıdentiniń 2022 jylǵy 14 naýryzdaǵy № 830 Jarlyǵyna sáıkes qolma-qol shetel valıýtasyn jáne (nemese) shetel valıýtasyndaǵy qarajatty Respýblıka Ulttyq Bankiniń baǵamy boıynsha 10 000 (on myń) AQSh dollarynan asatyn somada áketýge tyıym salynady.

Vıdeodan alynǵan kadr