Ózbekstanǵa 24 myń lıtr benzındi zańsyz áketpek bolǵan sheteldik shekarada ustaldy

TÚRKІSTAN. QazAqparat – Túrkistan oblysyndaǵy «Qazyǵurt» keden beketinde 24 myń lıtr AI-92 markili benzınin zańsyz áketý áreketiniń joly kesildi. Bul týraly QazAqparat Memlekettik kirister komıtetiniń baspasóz qyzmetine silteme jasap habarlaıdy.

«Qazyǵurt» keden beketiniń qyzmetkerleri 15 maýsym kúni Ózbekstanǵa baǵyttalǵan «DAF» markaly avtokólik quralyn toqtatady. Ózbekstan Respýblıkasy azamatynyń basqarýyndaǵy kólikte kedendik deklaratsııa boıynsha júktelgen «Oksıgenat» taýarynyń ıisi kúdik týǵyzyp, qarap-tekserý júrgizilgen. Kedendik tekserý kezinde jalpy 24 dana plastmas ydystarǵa (árqaısysy 1 myń lıtrden) quıylǵan, ıisi benzınge uqsaıtyn suıyqtyq anyqtalǵan. Synamalary alynyp, kedendik zertteýler ortalyǵyna joldanyp, nátıjesinde taýardyń AI-92 markili benzın ekeni rastalady.

Sot sheshimimen zań buzýshy ákimshilik jaýapkershilikke tartylyp, oǵan 103,5 myń teńge mólsherinde aıyppul salyndy jáne ustalǵan taýar memleket paıdasyna tárkilendi.

Aıta keteıik, qazirgi ýaqytta benzın, dızel otynyn jáne jekelegen munaı ónimderin avtokólik quraldarymen elimizden syrtqa alyp ketýge tyıym salynǵan.