Ózbekstandyqtar Qazaqstan kásipkerlerimen birge jumys isteýge nıetti
Bul týraly búgin Tashkentte ótken sheteldik jáne jergilikti ınvestorlardyń usynystaryn ashyq talqylaý alańynda aıtyldy. Buǵan deıin pikirtalas alańynda eldegi hımııa jáne metallýrgııa, munaı gaz óndirisi men jeńil ónerkásip máselesi talqylanǵan bolatyn.
Baýyrlas elder arasyndaǵy júıeli jumystyń nátıjesinde eki el aýmaǵynda birneshe birlesken kásiporyn jumys istep tur. Endi eki el arasyndaǵy mashına jasaý salasyn odan ári jandandyrý jaıy sóz boldy. Jıynda Ózbekstandaǵy eń iri mashına jasaý jáne aýyl sharýashylyǵy tehnıkalary men elektr jabdyqtaryn shyǵaratyn kompanııalar ózderiniń ınvestıtsııalyq múmkindikterin tanystyrdy.
Bir ǵana «Ýzavtosanoat» AQ 2021 jylǵa deıin jalpy somasy 290 mıllıon AQSh dollarynan asatyn 10 ınvestıtsııalyq jobany júzege asyrmaq. Onyń ishinde kólikterge qajetti qosalqy bólshekter men jeńil kóliktiń jańa túrin shyǵarý da bar. Osylaısha, buǵan deıin bizdiń elge jeńil kólik eksporttap kelgen ózbekstandyqtar endi qazaqstandyq kásipkerlerdi birlesip jumys isteýge shaqyryp otyr. Oǵan qosa, el prezıdenti Jarlyǵymen tamyz aıynan bastap Ózbekstanda sheteldik kapıtaly bar kásiporyndar qurý jeńildetildi.
«Álbette ózge elderdiń ınvestıtsııa salýshylarymen tyǵyz baılanys ornatýǵa daıynbyz. Jobany aldymen birge otyryp talqylaımyz, múmkindikterin saralap, qyzyǵýshylyq bolsa ortaq jumys isteýge daıynbyz. Qajet bolsa, barlyq jaǵynan qoldaý kórsetemiz»,- dedi Ýzavtosanoat» AQ strategııalyq josparlaý bóliminiń bastyǵy Bahodır Rahmonov.
«Biz jańadan ósip kele jatqan naryqtyń ortasynda turmyz. Bir jaǵynan álemdik naryqqa shyǵýǵa qolaıly. Bul jerde TMD elderi men Eýropa, Qytaı jáne Ontústik-shyǵys Azııa naryǵyna jol ashylady. Biz búgingi sharany ótkizý arqyly sol múmkindikterge birlese shyǵýdyń jolyn qarastyrdyq. Oǵan qosa, osyǵan qyzyǵýshylyq tanytyp otyrǵan ınvestorlardyń áleýetin arttyrýdy kózdep otyrmyz» ,- deıdi Ózbekstan ınvestıtsııalyq komıteti ınvestıtsııalyq bólim basshysy Nodır Abdýllaev.