Ózbekstandyq delegatsııa Almatynyń sýmen qamtý tehnologııasymen tanysady

ALMATY. QazAqparat - Almaty qalalyq sýmen qamtý júıesiniń ozyq tehnologııalarymen tanysýǵa Ózbekstan men Astana qalasynan delegatsııa keldi, dep habarlaıdy QazAqparat tilshisi.

Qalada «Smart Almaty» kontseptsııasyn júzege asyrý maqsatynda sý qubyry-káriz sharýashylyǵy protsesin tsıfrlandyrý, avtomattandyrý qolǵa alynǵan.

Búgin tsıfrlandyrý tájirıbesin almasý jáne óndiristik jumys baǵyttarymen bólisý maqsatynda Almaty sý mekemesine Tashkent jáne Astanadan áriptester keldi. Kezdesý barysynda jańa tehnologııalardy engizý taqyrybynda konferentsııa ótti.

«Almaty sý» memlekettik kommýnaldyq kásipornynyń bas dırektory Ermek Úsenbaevtyń aıtýynsha, kásiporynnyń barlyq nysandary men jelileri tsıfrly júıege aýystyrylǵan.

«Ótinishterdi qabyldaý jáne taratý júıesi avtomattandyrylǵan. Óndiriske jańa tehnologııalyq júıeler engizilgen. Sonyń arqasynda búgin biz edáýir nátıje kórip otyrmyz, sonymen qatar elektr qýatyn únemdeýge bolady. Apattyq jaǵdaılardy shuǵyl túrde aldyn alyp, sý shyǵyny azaıdy», - dedi Ermek Úsenbaev.

Onyń aıtýynsha, avtomattandyrý júıesin engizýden keıin elektr qýatyn únemdeý kórsetkishi 5%-ǵa (saǵatyna 1,6 mln.kVt) kóterildi. Sý shyǵyny 5%-ǵa, apattyq jaǵdaılar 10%-ǵa qysqardy. Qubyrlardy paıdalaný merzimi 15%-ǵa uzartyldy. Eńbek qaýipsizdiginiń kórsetkishi 100 %-ǵa jetken.

Arnaıy kelgen delegatsııaǵa jańa arnaıy tehnıkalar kórsetildi. Qaladaǵy basty máselelerdiń biri káriz qubyrlarynyń lastanýy, sonyń ózi ekologııalyq ortany buzýǵa áser etedi. Sheteldikterge kollektorlardy tazalaıtyn jáne de qubyrlardyń bitelip qalýynyń aldyn alatyn kólik tanystyryldy.

Sonymen qatar, kásiporynda qyzmet etetin baqylaýshylar elektrosamokattarmen qamtamasyz etildi.

Sý aǵyndaryn anyqtaý maqsatynda trassa jáne aǵyndardy anyqtaıtyn qurylǵylar, teleınspektsııanyń zamanaýı túrleri satyp alyndy.

Aıta ketý kerek, Almaty bıligi «Tsıfrly sý arnasy» baǵdarlamasyn qabyldady. Bul qujat boıynsha 2019-2020 jyldary mekemedegi sýdy óndirýden bastap, halyqqa taratýǵa deıingi úderisti avtomatty júıege ótkizý josparlanyp otyr.

Mamandardyń aıtýynsha, bul jobalardy júzege asyrý kezinde elektr qýaty únemdeledi, apattyq jaǵdaılar azaıady jáne de apattyq jaǵdaılardyń aldyn alý ýaqyty qysqarady, jabdyqtardyń tozý deńgeıi tómendeıdi. Sonymen birge qyzmet kórsetý sapasy jaqsarady.