Ózbekstandyq BAQ-qa sholý: Qazaqstan men Ózbekstan yntymaqtastyq áleýetterin tıimdi paıdalanatyn kez keldi

ASTANA. QazAqparat - Ózbekstan sońǵy kezderi úlken ózgeristerdiń tabaldyryǵyn attaǵan tárizdi. Prezıdent laýazymyna otyrǵan Shavkat Mırzıeev eldiń ishki-syrtqy saıasatyna biraz ózgeristerdiń lebin sezdirdi. Sarapshylar da ondaı aıtýly ózgerister qatarynda Ózbekstan basshysynyń negizinen ári eń birinshi kezekte kórshiles eldermen yntymaqtastyqty nyǵaıtýǵa kóp kúsh salyp jatqanyn atap kórsetedi. Aıta keterligi, sońǵy kezderi Ózbekstannyń buqaralyq aqparat quraldary da memlekettiń halyqaralyq qatynastaryna, kórshi elderdiń, sonyń ishinde Qazaqstannyń ekonomıkalyq-saıası ómirine úńile bastady. Kórshiler ne deıdi, sholyp kórelik.

Qyrkúıektiń ekinshi jartysynda Qazaqstan-Ózbekstan saýda-dıplomatııalyq qatynastarynda erekshe jandaný baıqaldy. Qazaqstan Prezıdenti Nursultan Nazarbaevtyń resmı saparmen Ózbekstanǵa barýy munyń basty alǵysharty boldy. Osy taqyrypta kóptegen ózbek aqparat quraldary jarysa jazdy.

Ózbekstannyń eń kóp oqylatyn ınternet basylymy daryo.uz óz oqyrmandaryna «Shavkat Mırzıeev pen Nursultan Nazarbaev bıyl 7 ret kezdesti» degen taqyrypta fotogalereıa usyndy. Onda memleketter basshylarynyń túrli halyqaralyq sammıtter, sharalar, memlekettik saparlar aıasynda Qazaqstanda 4 ret, sondaı-aq Qytaıda, Saýd Arabııasynda jáne Ózbekstanda kezdeskeni aıtylady. Bir qyzyǵy, basylymnyń resmı aqparattaryn ortasha tórt-bes myń adam oqysa, osy fotogalereıany qaraǵandardyń sany araǵa bir apta salyp 52 myńdyq mejeden bir-aq shyqqan eken.

Jalpy, ózbek aýdıtorııasy Memleket basshysynyń, resmı delegatsııalardyń saparlaryn aıtpaǵanda, eki el arasyndaǵy oqıǵalardy, saýda-sattyq jaıyn keńinen talqylaýda. Sonyń ishinde Ońtústik Qazaqstan oblysynda iske qosylǵan turmystyq gaz plıtalaryn jınaý tsehynyń ashylýy, Qazaqstan munaıyn Ózbekstanǵa tasymaldaý týraly kelisim jobasy, Qazaqstan men Ózbekstannyń iri qalalary arasynda avtobýs qatynasyn jolǵa qoıý jobasy, 2020 jylǵa deıin jalpy quny 320 mıllıon AQSh dollary bolatyn Qazaqstan temirjol relsterin Ózbekstanǵa jetkizý jobasy, ǵarysh ındýstrııasy salasyndaǵy birlesken jobalardyń jasalýy sııaqty ekonomıkalyq máseleler, sondaı-aq Qazaqstannyń syrtqy saıası ómirine qatysty habarlar, el ishindegi mańyzdy ekonomıkalyq aqparattar keńinen aıtylady.
 

Atap aıtqanda, daryo.uz basylymy Qazaqstannyń BUU-ny reformalaý jónindegi deklaratsııany qoldaıtyny týraly, Qazaqstannyń avtomobıl eksporttaý boıynsha rekord ornatqany týraly habarlar birshama aýdıtorııa jınaǵan.
 

Ózbek aýdıtorııasyna orys tilinde aqparat taratatyn tanymal saıttardyń biri podrobno.uz-da Qazaqstan Prezıdenti Nursultan Nazarbaevtyń 2020 jylǵa deıin eki el arasyndaǵy ózara saýda kólemin 5 mlrd AQSh dollaryna deıin jetkizý jospary jaıyndaǵy maqala oqyrmandar arasynda keńinen talqylanǵan.

Erekshe atap kórsetken jón, osy saıt Qazaqstan Prezıdenti Nursultan Nazarbaevtyń sózderinen jıi dáıeksóz keltirip otyrady. Osy jolǵy resmı sapary barysynda Memleket basshysynyń árbir sózi osy saıttyń jeke maqalasy boldy desek, qatelespeımiz. Muny da kórshi el aýdıtorııasynyń Qazaqstan Prezıdentiniń saıasatyna turaqty nazar aýdaryp otyrǵanyna joryǵan durys.

Tutastaı alǵanda kúndelikti aqparat aǵynyn saralasaq, qazir ózbek baspasózi de Qazaqstannyń tirshiligine nazar aýdara bastaǵan. Aıta keterligi, burnaǵy jyldary memleketter basshylarynyń resmı saparyna qatysty aqparattar ortalyq aqparat agenttiginiń kólemdi sholý materıalymen shektelip jatatyn. Al sońǵy kezderi resmı sapar qarsańynda da, odan keıin de eki el baılanystarynyń jańa kelbeti týraly túrli pikirler bildirile bastady. Bul ásirese Qazaqstan Prezıdenti Nursultan Nazarbaevtyń Ózbekstanǵa sapary jaıynda bolyp otyr

Qazaqstan Prezıdentiniń Ózbekstanǵa 16-17 qyrkúıektegi resmı sapary qarsańynda Ózbekstannyń resmı organy «Halq sýzı» («Halyq sózi») gazetinde «Jahon» aqparat agenttigi jýrnalısiniń «Ózbekstan - Qazaqstan: Yntymaqtastyq áleýetterin tıimdi paıdalaný jolynda» atty taldaý maqalasy jarııalandy. Onda avtor eki el arasyndaǵy saýda-ekonomıkalyq, mádenı-gýmanıtarlyq yntymaqtastyq boıynsha qol jetkizilgen jetistikterge toqtala kele, aldaǵy resmı sapardan Ózbekstan jaǵy da kóp úmit kútip otyrǵanyn aıtady.

«Mynany senimmen aıtý kerek, Qazaqstan basshysynyń memlekettik sapary barysynda Prezıdentter Shavkat Mırzıeev pen Nursultan Nazarbaevtyń aldynda turǵan kezdesý jáne kelissózder ózara yntymaqtastyq áleýetin tıimdi paıdalaný úderisinde birge bıik belesterdi baǵyndyrý úshin elderimiz umtylystarynyń logıkalyq jalǵasy bolady» dep jazady «Halyq sózi» gazeti.

Araǵa bir kún salyp, osy gazettiń 15 qyrkúıektegi nómirinde Qazaqstan Respýblıkasynyń Prezıdenti janyndaǵy Qazaqstan strategııalyq zertteýler ınstıtýtynyń dırektory Z. Sháýkenovanyń «Qazaqstan - Ózbekstan: ýaqyt synynan ótken dostyq» taqyrybymen kólemdi saraptama maqalasy jaryq kórdi. Bundaı kólemdi saraptama, ásirese kórshiles Qazaqstannyń zertteýler ınstıtýty tarapynan jasalǵan taldaýlar ózbek aýdıtorııasy úshin shynymen sony taqyryp. Zertteýshi óz maqalasynda elder arasyndaǵy saýda-dıplomatııalyq jetistikterdi faktilermen naqtylaı kele, qazaq tiliniń latyn grafıkasyna negizdelgen jańa álipbıge ótýi eki halyqtyń arasyn burynǵydan da jaqyndata túsetinine senim artady.

Jalpy, qazaq-ózbek baılanystary qaıta jandanyp kele jatyr deýge negiz bar. Ózbekstan aqparat quraldarynyń Qazaqstanǵa qatysty jańalyqtar berip, osyny oqı bastaýynyń ózi kóp jaıttan habar berse kerek.