Ózbekstandaǵy Prezıdent saılaýyna 59 qazaqstandyq baıqaýshy qatysty

ASTANA. QazAqparat - 2016 jylǵy 4 jeltoqsanda Ózbekstan Respýblıkasy Prezıdentiniń saılaýy boldy, bul saılaý halyqaralyq qoǵamdastyq tarapynan zor qyzyǵýshylyq týǵyzdy, dep habarlaıdy QR OSK baspasóz qyzmetinen.

Saılaýǵa EQYU-nyń demokratııalyq ınstıtýttar jáne adam quqyqtary jónindegi bıýrosynan, Táýelsiz Memleketter Dostastyǵynan, Shanhaı Yntymaqtastyq Uıymynan, Dúnıejúzilik saılaý organdarynyń qaýymdastyǵynan jáne Islam yntymaqtastyǵy uıymynan, sondaı-aq 46 memleketten 548 halyqaralyq baıqaýshy akkredıtteldi.

 

59 baıqaýshydan turǵan qazaqstandyq delegatsııa, onyń ishinde Ortsaılaýkom Tóraǵasy B. Imashev, Ortsaılaýkom múshesi M. Sársembaev, Parlament Májilisiniń depýtattary F. Karataev, K. Erjan jáne Qazaqstan óńirleriniń ókilderi, eń kóp quramdy delegatsııalardyń biri boldy.

Qazaqstandyq baıqaýshylar Ózbekstan astanasymen qatar óńirlerinde de prezıdenttik saılaýdy baıqaýǵa belsendi qatysty, saılaýdyń joǵary deńgeıde uıymdastyrylǵanyn, ýchaskelik saılaý komıssııalarynyń biliktiligin, saılaý protsesiniń ashyqtyǵy men aıqyndyǵyn atap ótti.